“Dw i ddim yn cefnogi Caerdydd,” meddai rheolwr Abertawe

 
Steve Cooper

Steve Cooper, rheolwr tîm pêl-droed Abertawe

Llun: golwg360 / Alun Rhys Chivers

Mae Steve Cooper, rheolwr tîm pêl-droed Abertawe, yn gwadu ei fod yn cefnogi Caerdydd – wrth i’r ddau dîm baratoi i herio’i gilydd yn Stadiwm Liberty heddiw (dydd Sul, Hydref 27).

Dyma’r cyfarfod cyntaf rhwng y ddau dîm ers 2014, ac fe fu cryn dipyn o sôn ers iddo gael ei benodi ar ddechrau’r tymor fod rheolwr yr Elyrch a’i deulu – gan gynnwys ei dad, y cyn-ddyfarnwr Keith Cooper – yn cefnogi’r Adar Gleision.

“Pe bai gen i gysylltiad go iawn â Chaerdydd, byddwn i’n dweud hynny,” meddai Steve Cooper wrth amddiffyn ei hun ar drothwy’r gêm ddarbi yr wythnos hon.

“Dw i ddim yn gelwyddgi, a dw i’n sicr ddim yn mynd i ddweud celwydd wrth gefnogwyr Abertawe.

“Ond does dim cysylltiad – dim un owns o gysylltiad, o atgofion, o gysylltiad iddyn nhw, dim byd.”

Cael ei fagu mewn ardal rygbi

Ac yntau’n enedigol o Bontypridd, mae’n dweud mai ardal rygbi oedd hi pan oedd e’n tyfu i fyny yn y 1980au – a bod hynny’n dal yn wir hyd heddiw.

Mae’n dweud nad oes ganddo fe atgofion o ddilyn rygbi na phêl-droed yn blentyn, ac nad oedd ei ffrindiau’n cefnogi Abertawe na Chaerdydd ar y cyfan.

“Dw i’n credu mai Lerpwl, Man U ac Everton oedd [y timau mawr] yn y dyddiau hynny. Dyna ein tri phrif glwb.

“Alla i ddim cofio neb yn cefnogi Caerdydd nac Abertawe bryd hynny, gadewch i ni gael hynny’n glir.

“Dw i’n sicr yn dod o ardal rygbi, ond do’n i ddim wir yn hoffi rygbi chwaith.

“Dw i’n dod o Bontypridd, roedd yr ysgol yn un rygbi a doedd gyda ni ddim tîm pêl-droed.

“Ro’n i ar y cyrion mewn nifer o ffyrdd, mewn gwirionedd.

“Am wn i, gan fod Dad yn y byd pêl-droed, dyna’r peth naturiol i fi ei wneud.

“Ond fe wnes i adael gartre’ yn 16 oed a symud i’r gogledd.”

Herio Neil Warnock

Wrth drafod ei wrthwynebydd ar ymyl y cae, mae’n dweud mai’r gêm ddydd Sul fydd ei un gyntaf yn erbyn Neil Warnock, rheolwr Caerdydd.

Yn wir, dydy’r ddau ddim wedi cyfarfod wyneb yn wyneb o’r blaen ond mae’n dweud nad yw’n ei ofni.

“Ro’n i’n amlwg yn ymwybodol iawn ohono fe a’r amser mae e wedi’i dreulio yn y gamp.

“Rhaid ei gydnabod e. Dw i wedi bod yn rheolwr ers tri mis, ac mae e wedi bod yn ei wneud e ers degawdau.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd