Abertawe 4–1 Gillingham
Mae Abertawe ym mhumed rownd y Cwpan FA yn dilyn buddugoliaeth gyfforddus dros Gillingham yn y bedwaredd rownd ar y Liberty brynhawn Sadwrn.
Sgoriodd McBurnie ddwy waith yn yr hanner cyntaf cyn i Celina a McKay selio’r fuddugoliaeth yn yr ail gyfnod.
Deg munud yn unig a oedd ar y cloc pan benodd Oli McBurnie’r Elyrch ar y blaen o groesiad Leroy Fer.
Dyblodd yr Albanwr y fantais wedi hanner awr yn dilyn gwaith creu taclus Barrie McKay a Connor Roberts.
Roedd Gillingham yn ôl yn y gêm yn gynnar yn yr ail hanner diolch i beniad Josh Rees o groesiad cywir Mark Byrne.
Adferodd Bersant Celina ddwy gôl o fantais yr Elyrch ddeunaw munud o’r diwedd gyda tharan o ergyd i’r gornel uchaf o bum llath ar hugain.
A rhoddwyd yr eisin ar y gacen chwe munud o’r dwiedd pan rwydodd Mckay o groesiad Roberts.
Buddugoliaeth gyfforddus i dîm Graham Potter yn y diwedd ac Abertawe yn yr un ar bymtheg olaf am yr ail dymor yn olynol.
.
Abertawe
Tîm: Mulder, Roberts, vn der Hoorn, Carter-Vickers, John, Fer (Fulton 82’), Celina, Grimes, Baker-Richardson (James 69’), McBurnie (Byers 82’), McKay
Goliau: McBurnie 10’, 32’, Celina 73’, McKay 84’
Cerdyn Melyn: Carter-Vickers 14’
.
Gillingham
Tîm: Holy, Zakuani, Ehmer, Ogilvie (Parrett 83’), O’Neill (Fuller 83’), Rees, Byrne, Garmston, Charles-Cook, Eaves, List (Hanlan 71’)
Gôl: Rees 51’
.
Torf: 15,080
