Victor Camarasa yn cipio’r pwyntiau i Gaerdydd yn erbyn Leicester City

Leicester City 0–1 Caerdydd                                                                       

Cipiodd Caerdydd fuddugoliaeth ddramatig gyda gôl hwyr Victor Camarasa yn erbyn Leicester City yn Stadiwm King Power brynhawn Sadwrn (Rhagfyr 29).

Sgoriodd y Sbaenwr gôl wych yn yr amser brifo ar ddiwedd y gêm i sicrhau buddugoliaeth oddi cartref gyntaf yr Adar Gleision yn Uwch Gynghrair Lloegr y tymor hwn.

Caerlŷr a oedd tîm gorau’r hanner cyntaf ac fe wnaeth Neil Etheridge yn y gôl i Garedydd yn dda i gadw pethau’n ddi sgôr.

Roedd yr Adar Gelsion yn llawer gwell wedi’r egwyl ond cafodd Caelŷr gyfle gwych i fynd ar y blaen chwarter awr o’r diwedd wedi wedi i Simon Hooper ddynodi cic o’r smotyn ddadleuol am drosedd gan Sean Morrison ar James Maddison. Maddison a gymerodd y gic ond cafodd ei harbed gan Etheridge a gwaneth Sol Bamba yn wych i gyrraedd y bêl rydd gyntaf a’i chlirio.

Yna, fe gipiodd Caerdydd fuddugoliaeth haeddiannol gyda gôl wych yn yr ail funud o amser a ganiateir am anafiadau ar ddiwedd gêm, Camarasa’n taro ergyd berffaith o bum llath ar hugain a mwy, gôl yn deilwng o ennill unrhyw gêm.

Mae’r tri phwynt yn codi Caerdydd i’r unfed safle ar bymtheg yn y tabl, bedwar pwynt yn glir o safleoedd y gwymp.

.

Caerlŷr

Tîm: Schmeichel, Ricardo Pereira, Soyuncu, Maguire, Chilwell, Mendy, Ndidi, Albrighton (Ghezzal 58’), Maddison, Gray (Okazaki 79’), Vardy (Iheanacho 68’)

.

Caerdydd

Tîm: Etheridge, Ecuele Manga, Morrison, Bamba, Cunningham, Gunnarsson, Hoilett (Reid 83’), Camarasa, Arter (Peltier 90+5’), Murphy (Harris 78’), Paterson

Gôl: Camarasa 90+2’

Cardiau Melyn: Etheridge 53’, Morrison 90+4’

.

Torf: 32,047