Mae tîm pêl-droed Abertawe’n dechrau ar gyfnod o bedair gêm mewn 11 o ddiwrnodau heddiw (dydd Sadwrn, Rhagfyr 22), wrth i’r Elyrch deithio i Hull.
Byddan nhw’n croesawu Aston Villa i’r Liberty ar Ddydd San Steffan, a Wigan bedwar diwrnod yn ddiweddarach, cyn teithio i Reading ar Ddydd Calan.
Pe bai’r Elyrch yn sicrhau triphwynt heddiw, byddan nhw wedi ennill tair gêm yn olynol am y tro cyntaf ers i Graham Potter gael ei benodi’n rheolwr.
Mae rheoli tîm dros gyfnod y Nadolig yn brofiad newydd i Graham Potter, ar ôl treulio saith mlynedd yn Ostersunds yn Sweden, lle mae’r tymor yn cael ei gynnal rhwng Ebrill a Thachwedd.
‘Edrych ymlaen’
“Roedd ychydig yn wahanol y tymor diwethaf gan fod Ostersunds yn chwarae yng Nghynghrair Europa ym mis Rhagfyr, ac roedden ni’n paratoi ar gyfer y gêm yn erbyn Arsenal ar yr adeg hon y llynedd,” meddai Graham Potter.
“Felly dyma fy mhrofiad cyntaf o hyn fel rheolwr, a dw i’n edrych ymlaen yn fawr iawn.
“Mae llawer o gemau, rhai gemau diddorol, a gemau mawr.
“[Triphwynt] yw’r cyfan allwch chi obeithio amdanyn nhw. Rhaid i ni ganolbwyntio ar y gêm nesaf, gêm anodd oddi cartref yn erbyn tîm [Hull] sydd wedi bod yn chwarae’n dda.
“Fe gadwon nhw lechen lân yn erbyn Norwich, sydd ddim yn hawdd, a churo Brentford felly maen nhw mewn lle da ac rydyn ni’n disgwyl gêm anodd.”