Gêm arall yn dechrau llithro o afael Morgannwg

 
Michael Hogan

Michael Hogan

Llun: Clwb Criced Morgannwg

Mae gêm arall yn dechrau llithro o afael Morgannwg ar ddechrau trydydd diwrnod yr ornest yn erbyn Sir Gaerloyw yn y Bencampwriaeth yng Nghaerdydd.

Mae’r ymwelwyr yn 284 am chwech – mantais batiad cyntaf hyd yn hyn o 147 gyda phedair wiced wrth gefn.

Mae Jack Taylor heb fod allan ar 98, a Ben Charlesworth, disgybl ysgol 17 oed, wedi sgorio 65 hyd yn hyn yn ei bedwaredd gêm i’r sir, ac yntau wedi cael caniatâd gan ei ysgol yn Rhydychen i chwarae yn y gêm.

Blaenoriaeth o 24 yn unig oedd gan yr ymwelwyr pan ddaeth Jack Taylor a Ben Charlesworth ynghyd, ond fe adeiladon nhw bartneriaeth ddi-guro o 143 am y seithfed wiced i roi’r Saeson mewn sefyllfa gref.

Mae’r bartneriaeth ddau rediad yn brin o’r bartneriaeth seithfed wiced orau erioed i Swydd Gaerloyw – record Alf Dipper ac Albert Waters ar gae Cheltenham 95 o flynyddoedd yn ôl.

Diwrnod rhwystredig

Diwrnod digon rhwystredig gafodd Morgannwg ar ôl i’r sesiwn gyntaf gael ei cholli yn ei chyfanrwydd oherwydd y glaw.

Daeth y chwaraewyr allan yn y pen draw am 1.25 a chollodd y Saeson eu chweched wiced – wiced gynta’r dydd – wrth i Ryan Higgins gael ei fowlio oddi ar ymyl ei fat gan gapten Morgannwg, Michael Hogan am 18.

Dyna pryd y daeth Ben Charlesworth, y batiwr llaw chwith, i’r llain i gwblhau wythnos lwyddiannus ar ôl taro 77 di-guro yn erbyn Middlesex yn ei gêm ddiwethaf.

Roedd y nerfau’n amlwg ar y dechrau wrth iddo ddarganfod y ffin dair gwaith oddi ar ymyl ei fat ond unwaith iddo ymgartrefu ar y llain, chwaraeodd e’n hyderus ar yr ochr agored. Cafodd e gefnogaeth dda gan Jack Taylor, a darodd hanner canred oddi ar 128 o belenni.

Daeth un cyfle cynnar i gipio wiced Ben Charlesworth, ond fe gafodd ei ollwng yn sgwâr ar yr ochr agored gan Connor Brown oddi ar fowlio Michael Hogan, ac fe aeth yn ei flaen i gyrraedd ei hanner canred oddi ar 104 o belenni ar ôl taro naw pedwar.

Perfformiad digon cyffredin a gafwyd gan fowlwyr Morgannwg, oedd heb eu chwaraewr amryddawn Ruaidhri Smith am gyfnod helaeth o’r prynhawn ar ôl iddo anafu ei ochr.

Bydd yn rhaid iddyn nhw fod ar eu gorau a chipio wicedi cynnar ar y trydydd diwrnod i roi cyfle i fatwyr Morgannwg orfodi’r Saeson i fatio eto er mwyn osgoi colli o fatiad a mwy.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd