Morgannwg dan bwysau yn Edgbaston

 

Llun parth cyhoeddus CC0 trwy Commons Wikimedia

Mae tîm criced Morgannwg dan bwysau cyn dechrau ail ddiwrnod eu gêm Bencampwriaeth yn erbyn Swydd Warwick yn Edgbaston.

Cipiodd y troellwr coes Josh Poysden bum wiced am 29 i’r Saeson – ei ffigurau gorau erioed – wrth i Forgannwg gael eu bowlio allan am 220 yn eu batiad cyntaf, cyn i Swydd Warwick orffen y diwrnod ar 24 am ddwy yn eu batiad cyntaf.

Penderfynodd Morgannwg fatio ar y bore cyntaf a chael eu cosbi ar unwaith – dim ond David Lloyd (39), Owen Morgan (36) a’r capten dros dro Chris Cooke (34) oedd wedi cyfrannu gyda’r bat.

Ychwanegodd agorwyr Morgannwg, Nick Selman a Jack Murphy 44 mewn 14 o belawdau cyn i Henry Brookes daro coes Murphy o flaen y wiced.

Colli wicedi’n gyflym

Collodd Connor Brown ei wiced yn fuan wedyn, wrth ddarganfod y wicedwr oddi ar fowlio Chris Wright, a chafodd Nick Selman ei ddal gan faeswr agos oddi ar fowlio’r troellwr Jeetan Patel.

Sgoriodd yr Awstraliad Usman Khawaja bedwar yn unig yn ei batiad cyntaf i’r Cymry cyn i Chris Cooke ac Owen Morgan adeiladu partneriaeth o 57 mewn 15 o belawdau cyn i Josh Poysden daro coes Morgan o flaen y wiced a chael Andrew Salter allan, wedi’i ddal.

Roedd David Lloyd allan dan gwmwl, wrth i’r dyfarnwr benderfynu ei fod e wedi taro pêl i’r wicedwr Tim Ambrose oddi ar fowlio Jeetan Patel, a tharodd Poysden goes Ruaidhri Smith o flaen y wiced cyn bowlio Lukas Carey i gipio’i bumed wiced.

Batiad cynta’r Saeson

Os oedd bowlwyr Swydd Warwick wedi cael llwyddiant ar lain Edgbaston, tro bowlwyr Morgannwg oedd hi i ddisgleirio yn hwyr yn y dydd, gan gipio dwy wiced hwyr.

Cafodd Will Rhodes ei fowlio gan Lukas Carey oddi ar belen gynta’r batiad, cyn i Timm van der Gugten fowlio Dominic Sibley yn y degfed pelawd.

Mae’r ffaith mai’r bowlwyr sydd wedi disgleirio hyd yn hyn yn eironig o gofio bod dau brif fowliwr y naill sir a’r llall yn absennol.

Mae Morgannwg heb Marchant de Lange a’u capten Michael Hogan, tra bod Olly Stone a Ryan Sidebottom allan o dîm y Saeson.

Sgorfwrdd

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd