Jazz Carlin yn troi at nofio mewn dŵr agored

Mae’r Gymraes Jazz Carlin wedi troi ei sylw at nofio dŵr agored wrth iddi baratoi ar gyfer Gemau Olympaidd Tokyo yn 2020.

Ar ôl cyfaddef ei siom o gael dwy fedal arian yn Rio de Janeiro y llynedd, dywedodd ei bod hi wedi cwympo mewn cariad â dull newydd o nofio.

Dywedodd hi wrth y BBC: “Mae pobol yn credu ’mod i’n wallgo’ ac yn gofyn a ydych chi’n cael eich taro.

“Mae ofn ofnadwy sglefrod môr arna’i hefyd, ond mae’n brawf newydd a ffres.”

Bydd hi’n cystadlu mewn dŵr agored am y tro cyntaf yn China yr wythnos nesaf, a hynny ar ôl colli Pencampwriaethau’r Byd dros yr haf.

‘Anodd’

Dywedodd Jazz Carlin: “Roedd hi’n anodd iawn colli Pencampwriaethau’r Byd a’u gwylio nhw ar y teledu.

“Ond dyna’r penderfyniad cywir, gan mod i’n teimlo’n fyw eto.

“Mae gen i gymaint mwy o egni, dwi wedi cael adfywiad a bydd hynny yn fy helpu yn y tymor hir, yn sicr.

“Mae pobol yn sôn am siom ôl-Olympaidd ond tan eich bod chi wedi bod yno ac wedi bod trwy hynny, dydych chi ddim yn deall.”