James Bracey yn cosbi Morgannwg – eto

Diweddarwyd am  
Y cae

Cae Casnewydd ym Mharc Spytty

Cae Casnewydd ym Mharc Spytty

Brwydrodd Swydd Gaerloyw yn ôl ar ddiwrnod cyntaf eu gêm Bencampwriaeth yn erbyn Morgannwg ar Barc Spytty yng Nghasnewydd ddoe, diolch i 152 gan James Bracey, fel eu bod nhw’n dechrau’r ail ddiwrnod heddiw ar 360 am chwech.

Dyma oedd pedwerydd canred y batiwr 22 oed yn ei yrfa dosbarth cyntaf, a’i drydydd yn erbyn Morgannwg, ac fe fydd Morgannwg yn falch o fod wedi cipio’i wiced ar ddiwrnod anodd ar y cyfan i’r bowlwyr.

Bowlwyr Morgannwg yn dechrau’n gryf

Ar ôl aros 65 o flynyddoedd i griced dosbarth cyntaf ddychwelyd i Gasnewydd, tair pelen yn unig gymerodd hi i Forgannwg gipio’u wiced gyntaf, pan gafodd Miles Hammond ei ddal gan Kieran Bull yn y slip oddi ar fowlio Marchant de Lange.

Roedd yr ymwelwyr yn 50 am ddwy pan darodd Graham Wagg goes y capten Chris Dent o flaen y wiced am 14, a thair pelawd yn ddiweddarach, cafodd George Hankins ei fowlio gan David Lloyd am dri wrth i’r bêl ddechrau gwyro, a’r sgôr yn 55 am dair.

Roedd yn ymddangos, felly, fod y penderfyniad i wahodd Swydd Gaerloyw i fatio yn mynd i dalu ar ei ganfed o’r dechrau’n deg i Forgannwg.

Tro y batwyr i ddisgleirio

Ond cynigiodd James Bracey sefydlogrwydd i’r Saeson ben draw’r llain, wrth iddo sgorio canred oddi ar 145 o belenni, ar ôl taro 17 pedwar.

Cyrhaeddodd Gareth Roderick ei hanner canred oddi ar 113 o belenni, ar ôl taro chwe phedwar, ac roedd e heb fod allan ar 74 erbyn amser te, a James Bracey heb fod allan ar 127, a’r sgôr yn 236 am dair.

Parhau i gosbi Morgannwg wnaeth batwyr Swydd Gaerloyw, ar lain oedd yn dechrau cynnig llai a llai i’r bowlwyr wrth i’r diwrnod fynd yn ei flaen.

Roedd y bartneriaeth am y bedwaredd wiced yn werth 199 erbyn i Timm van der Gugten daro coes Gareth Roderick o flaen y wiced am 88, a Swydd Gaerloyw’n 254 am bedair. Roedden nhw wedi para 52.1 o belawdau ar ôl i Forgannwg gipio’u pwynt bowlio cyntaf gyda’r drydedd wiced.

Morgannwg yn brwydro’n ôl

Daeth trobwynt toc ar ôl i James Bracey gyrraedd 150 oddi ar 234 o belenni, gan gynnwys 18 pedwar, pan gafodd Benny Howell ei fowlio gan Marchant de Lange am 35, a Swydd Gaerloyw’n 309 am bump ar ôl partneriaeth o 55.

Cwympodd wiced fawr James Bracey o fewn dim o dro, wrth iddo gael ei ddal gan Charlie Hemphrey yn y slip oddi ar fowlio Marchant de Lange am 152, a’r sgôr yn 314 am chwech. Roedd ei fatiad wedi para pum awr 40 munud.

Ryan Higgins (25) a Graeme van Buuren (21) oedd wrth y llain ar ddiwedd y dydd.

Sgorfwrdd

Chwaraeon

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd