Yr esgob a Meic Stevens

Diweddarwyd  

Dylan Iorwerth, Golygydd Gyfarwyddwr Golwg

Llun: Golwg

Dylan Iorwerth yn rhoi barn ar storm sylwadau’r canwr…

Yn y dyddiau pan oedd ymgyrchu gwleidyddol yn golygu mwy na thrydar, dw i’n cofio mynd i rali fawr gwrth-apartheid yn Llundain.

Un o’r siaradwyr oedd yr Esgob Trevor Huddleston, un o arwyr gwyn y frwydr yn erbyn cyfundrefn ffiaidd De Affrica. Ond cyn diwedd ei araith, mi gafodd ei fwian am fod yn hiliol.

Roedd y sioc ar ei wyneb yn amlwg ac mi ymddiheurodd yn syth, am alw gwleidyddion y dydd yn ‘pygmies’ o’u cymharu â’r dewrion croenddu.

Fel y canwr Cymraeg Meic Stevens mi ddywedodd rhywbeth heb sylweddoli sut y byddai’n cael ei gymryd ond, fel yn achos Meic Stevens hefyd, doedd hi ddim yn deg galw’r dyn ei hun yn hiliol.

Fel y rhan fwya’ o’r bobol sydd wedi mynegi barn am sylwadau’r canwr ac fel y rhan fwya’ o drefnyddion y gwyliau sydd wedi ei wahardd, do’n i ddim yng Nghaernarfon i’w glywed.

O weld adroddiadau o’r geiriau, hyd yn oed a derbyn eu bod yn anffodus, ar ysgol casineb y dyddiau yma, maen nhw ar ris isel iawn.

Ond gyrfa Meic Stevens sy’n dangos yn fwy na dim nad ydi o’n hiliol. Mae o wedi chwarae efo cerddorion o bob cefndir a hil; hebddo fo a Geraint Jarman, fydden ni’r Cymry Cymraeg cyfforddus yn gwybod fawr ddim am gerddoriaeth ac etifeddiaeth Tiger Bay.

Yr un gân sy’n dangos hynny yn fwy na dim ydi’r gân i Victor Parker, emyn o fawl i gerddor croenddu oedd yn cynrychioli diwylliant amrywiol yr hen ddociau.

Sylw amwys, efallai ychydig yn hiliol, ie. Dyn hiliol yn ei hanfod, na.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd