Almaenes yn hybu’r Gymraeg ym myd busnes

 

Bydd byd busnes a’r iaith yn elwa o gefndir a phrofiad merch o’r Almaen, sydd wedi dysgu Cymraeg mewn cwta pum mlynedd, wrth iddi ddod i arwain prosiect Cymraeg Byd Busnes y Mentrau Iaith.

O Sacsoni ddaw Daniela Schlick yn wreiddiol. Bu’n byw yn Berlin am 15 mlynedd, ond erbyn hyn mae wedi ymgartrefu ym Mhorthaethwy ym Môn. Mae’n cyfaddef iddi syrthio mewn cariad â’r Gymraeg ymhell cyn symud i fyw yma – sylweddolodd pwysigrwydd yr iaith i’r bobl pan oedd ar wyliau yn y gogledd flynyddoedd yn ôl. Cafodd flas ar yr iaith mewn Ysgol Haf ym Mangor a Phwllheli i ddechrau, cyn gwneud y penderfyniad i symud i Gymru dair blynedd yn ôl. Ar ôl cyfnod o setlo mewn gwlad ag iaith wahanol, “wrth gwrs” y byddai’n dysgu’r iaith, medd Daniela, a bellach mae’n “barod i weithio yn y Gymraeg i’w chefnogi”.

Gyda gradd mewn economeg a phrofiad o wneud prentisiaeth fel gohebydd ieithoedd tramor, nid yw’n syndod bod y swydd hon gyda’r Mentrau Iaith wedi denu ei sylw. Mae’n gweld bod y Gymraeg yn elfen hollol naturiol yng ngwaith nifer o fusnesau eisoes, ond nad oes digon o fusnesau yng Nghymru yn gwneud defnydd da o’r iaith. Ei nod yw sicrhau y bydd y prosiect yn helpu a chefnogi’r busnesau sydd am wneud mwy o ddefnydd o’r iaith neu gynnwys y Gymraeg yn rhan o’u busnes.

Ei chyngor i fusnesau sydd am wella eu harferion yw “dysgwch dipyn bach bob dydd” a siaradwch gymaint ag sy’n bosibl. Mae am annog busnesau i beidio â phoeni am eu sgiliau iaith, oherwydd bod y pethau bychain yn gwneud gwahaniaeth, ac mae hefyd yn eu hannog i gysylltu â’u Menter Iaith leol i ofyn am gymorth. Bydd Daniela a’i chydweithwyr ar draws Cymru ar gael i’w cefnogi.

Ei nod yn y pen draw yw cyfrannu at yr ymdrech i gynyddu’r defnydd o’r Gymraeg yn y gymdeithas yn gyffredinol, ac mae gweithio gyda byd busnes yn un ffordd o gyrraedd y nod hwnnw. Pan nad yw’n gweithio mae’n mwynhau rhedeg, canu gyda Chôr Dros y Bont (côr ar gyfer dysgwyr a Chymry Cymraeg) a threfnu sesiynau sgwrsio i ddysgwyr. Pob hwyl i Daniela yn gwneud ei rhan dros y Gymraeg – trwy gyfrannu at fyd busnes ac at ein diwylliant a’n ffordd o fyw.

Cafodd y swydd hon ei hysbysebu yn Golwg ac ar Golwg360.

Penodiadau

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd