Penodi Ffion Medi i gydlynu Barddas

 

Mae’n gyfnod newydd i Ffion Medi, sy’n gadael Theatr Felin-fach ar ôl deng mlynedd hapus i gydlynu gwaith Barddas

Ers rhai wythnosau mae Ffion Medi Lewis-Hughes wedi setlo yn ei swydd newydd fel Cydlynydd Barddas – y Gymdeithas Gerdd Dafod. Mae’n dilyn ôl traed Iola Wyn, ac yn edrych ymlaen at ddatblygu’r Gymdeithas a chreu tipyn o fwrlwm o gwmpas barddoniaeth ar hyd a lled Cymru.

Bydd Ffion yn gyfrifol am farchnata, hyrwyddo a gweinyddu ar ran y Gymdeithas Gerdd Dafod, a chydweithio ag aelodau’r Pwyllgor Gwaith i gynllunio a threfnu digwyddiadau amrywiol a lansiadau cyfrolau. Yn ogystal, bydd yn llywio’r gwaith o gyhoeddi Cylchgrawn Barddas bob chwarter.

MWY NA CHYHOEDDI

Ond i Ffion, mae potensial i ymestyn gwaith y Gymdeithas i wneud mwy na chyhoeddi, ac ysgogi beirdd ifanc i ymddiddori mewn barddoniaeth. Mae’n “hyderus bod ein beirdd ifanc ni yma yng Nghymru yn mynd i allu ysgogi a deffro darpar feirdd yn ein hysgolion a’n prifysgolion i fynd amdani, a rhoi cynnig ar farddoni!”

Derbyniodd “gyfleoedd gwych” gyda’r Theatr yn Nyffryn Aeron, ac un o’r profiadau mwyaf gwerthfawr oedd gweithio gydag ystod eang o bobl o 0 i 90+ oed o wahanol gefndiroedd. Mae’n gweld cyfle i ddefnyddio ei phrofiad o ymgysylltu’n greadigol â chymunedau i ehangu gwaith Barddas. “Mae beirdd ifanc Cymru heddiw bellach yn gwneud barddoniaeth yn cŵl ac yn bersonol” medd Ffion, ac mae angen “mynd â llenyddiaeth a barddoniaeth Gymraeg at y bobol ar lawr gwlad” – yn enwedig pobl ifanc.

TREGARON – Y LLE I FOD

Er mai merch o Ddihewyd, ac yna Dyffryn Aeron, yw Ffion, mae wedi ymgartrefu yn Nhregaron ers rhai blynyddoedd bellach ac yn byw yno gyda’i gŵr a’u dau o blant. Ac yn dilyn y cyhoeddiad y byddai Eisteddfod Genedlaethol Cymru yn ymweld â’r dref wledig yn 2020, mae Ffion – sy’n un o sylfaenwyr Gŵyl Tregaroc ac yn Gadeirydd côr merched newydd lleol – yn llawn gobaith am y dyfodol. “Tregaron yw’r lle i fod, bobol! Mae’r dref yn fwrlwm gydag amrywiol fudiadau a chymdeithasau yn gweithio’n frwd dros ddenu pobol i’r ardal a chreu momentwm o fewn y dre.” Mae’n siŵr bod blynyddoedd cyffrous o flaen Tregaron, ac o flaen Barddas hefyd gyda Ffion wrth y llyw.

Cafodd y swydd hon ei hysbysebu ar Golwg360.

Penodiadau

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd