Angen cyflenwad cyson o “bobl, syniadau ac egni newydd” ar amaeth

 

Delyth Jones – gwraig fferm sy’n byw byd amaeth – yw Swyddog Mentro newydd Menter a Busnes yn Aberystwyth.

Mae yna nifer fawr o bobl yn chwilio am ffordd i mewn i ffermio yng Nghymru, ac mae nifer o ffermwyr a thirfeddianwyr sydd eisoes wedi sefydlu yn dymuno cymryd cam yn ôl o’r diwydiant. A dyna pam y sefydlwyd cynllun Mentro – er mwyn torri tir newydd o ran paru newydd-ddyfodiaid a ffermwyr sy’n ystyried ymddeol. Mae’r cynllun wedi datblygu cymaint ers ei lansio yn 2015, bellach mae angen dau Swyddog Mentro i gwblhau’r gwaith ar draws Cymru.

Yr aelod diweddaraf i ymuno â’r tîm yw Delyth Jones – merch a gwraig fferm sy’n cyfaddef na allai “ddychmygu gwneud dim arall ond bod yn ynghlwm â’r diwydiant.” Mae hi’n awyddus iawn i helpu pobl ifanc sy’n dymuno mentro i fyd amaeth, ac mae’n edrych ymlaen at fod ar ben arall y ffôn (neu’r sgrîn) i gynnig gair o gyngor a chefnogaeth – i’r ffermwyr ifanc a’r rhai aeddfed.

Mae gan Delyth brofiad helaeth o weithio gydag amaethwyr. Yn fwyaf diweddar bu’n gweithio i EIDCymru, lle bu’n darparu gwasanaeth cefnogaeth a chymorth i ffermwyr a marchnadoedd da byw ynglŷn â rheolau symudiad defaid.

Ond beth am obeithion Delyth ar gyfer y swydd hon? Wel, mae’n cydnabod bod angen cyflenwad cyson o bobl newydd, syniadau newydd ac egni newydd ar bob diwydiant llewyrchus er mwyn ffynnu, ac nid yw’r diwydiant amaeth yn eithriad. “Rwy’n gobeithio bod pobl ifanc yn gallu cael y cyfle, dilyn eu breuddwydion a rhedeg eu busnes yn llwyddiannus fel bod y diwydiant amaeth yn un llewyrchus sy’n arwain at fuddiannau economaidd, diwylliannol ac ieithyddol yng nghefn gwlad Cymru” meddai.

Er mwyn i fyd amaeth barhau i lewyrchu yng Nghymru, mae Delyth o’r farn bod angen i amaethwyr ifanc fod yn hyderus ac ehangu eu gorwelion, ynghyd â chael meddwl agored am y posibiliadau. A’i phrif neges i amaethwyr ifanc? “Gwnewch y mwyaf o wasanaethau fel Cyswllt Ffermio a’r rhaglen Mentro i’ch cynorthwyo chi i wireddu eich amcanion.”

Pob hwyl i Delyth a thîm rhaglen Mentro gyda’r gwaith.

Cafodd y swydd hon ei hysbysebu ar Golwg360.

Penodiadau

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd