Crwt o Aberteifi yn Swyddog Llenyddiaeth yn y Gymuned

 

Mae hyd yn oed “siant ar derasau stadiwm pêl-droed” yn llên

Dyna farn Steffan Phillips – crwt o Aberteifi sydd newydd ei benodi’n Swyddog Llenyddiaeth yn y Gymuned gan Llenyddiaeth Cymru.

Mae Steffan yn wyneb cyfarwydd, gan ei fod wedi bod yn gynhyrchydd llawrydd ar rai o ddigwyddiadau newydd mwyaf llwyddiannus y diwylliant Cymraeg dros y ddwy flynedd diwethaf – Gŵyl Hen Linell Bell yn Aberystwyth (Arad Goch), a Gŵyl y Cynhaeaf yn Aberteifi.

Yn ei swydd newydd, mae Steffan yn gobeithio dangos i gymunedau ledled Cymru nad “rhywbeth uchel-ael” yw llên a llyfrau, fel y mae pobl yn tueddu i feddwl. Mae’n credu bod llenyddiaeth yn perthyn i bob elfen o’n bywydau pob dydd, ac i bob un ohonom – o berfformiadau byw o gerddi mewn tafarn i ffilmiau byrion llenyddol ar y we, o instapoetry a geiriau caneuon i siant ar derasau stadiwm pêl-droed. Rhan o’i ddyletswydd ef, mae’n dweud, fydd sicrhau bod “llenyddiaeth ar gael ym mhob man”. Drwy wneud hyn, bydd modd ennyn diddordeb pobl newydd a sicrhau, nid yn unig bod llên yn perthyn i bawb, ond ei bod hefyd yn cynnig llais i bawb.

Un o’r prosiectau y bydd Steffan yn gyfrifol amdanynt fydd cynllun Bardd Plant Cymru. Casia Williams yw’r Bardd Plant ar hyn o bryd, a bydd yn y swydd tan 2019. Mae Steffan yn credu bod sicrhau bod plant yn mwynhau darllen yn un o’r heriau sy’n ei wynebu, ac mae’n bwriadu defnyddio’r prosiect hwn a dulliau newydd a dyfeisgar o weithio i ennyn diddordeb plant Cymru mewn llenyddiaeth.

Mae Steffan yn cyfaddef bod llenyddiaeth wedi ei ysbrydoli, ac wedi ei dywys i fydoedd newydd a chyffrous yn ystod ei ieuenctid. Mae’n gobeithio trosglwyddo’r angerdd sydd ganddo am lenyddiaeth ymlaen i ieuenctid heddiw – pob hwyl iddo yn y gwaith.

Cafodd y swydd hon ei hysbysebu ar Golwg 360

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd