Pennaeth Addysg newydd yng Ngwynedd

 

Garem Jackson yw Pennaeth Addysg newydd Cyngor Gwynedd.

Cyn-yrrwr bws yn Bennaeth Addysg

Efallai fod ei wyneb yn gyfarwydd i rai ohonoch. Cyn mentro i’r byd addysg a chael swyddi fel Athro, Pennaeth, Arolygydd a Chynghorydd, bu Garem Prytherch Jackson yn actio ar lwyfan a theledu. Bu hefyd yn gyrru bysiau teithiau gwyliau ym Mhrydain ac ar y cyfandir. Mae’r profiadau diddorol y mae wedi’u cael mewn sawl maes yn golygu ei fod wedi dysgu llawer am bobl – rhywbeth a fydd o fudd mawr iddo yn ei rôl newydd yn Bennaeth Addysg Gwynedd.

Gwneud y pethau pwysig

Mae Garem Jackson yn ymgymryd â’r rôl bwysig hon mewn cyfnod anodd. Ond mewn cyd-destun o gyni ariannol a’r toriadau sy’n wynebu Cynghorau Sir, nid ‘gwneud mwy gyda llai’ yw nod Garem Jackson. Iddo ef, mae’n bwysicach ‘gwneud y pethau pwysig’ er mwyn cynnal a gwella safonau addysg.

“Os nad ydy rhywbeth yn ychwanegu gwerth gwirioneddol i safon addysg a bywydau ein plant a’n pobl ifanc, fydda’ i ddim yn ei wneud o – a dyna ydy fy neges i’n hysgolion i gyd”.

Beth sy’n bwysig iddo, felly? Wel, canolbwyntio ar ansawdd yr addysg, cefnogi a datblygu arweinwyr yr ysgolion, a chynnig y profiadau gorau o ran addysg a lles i bawb. Buddsoddi er lles pawb: ei weledigaeth yw sicrhau bod “POB plentyn a pherson ifanc yng Ngwynedd yn derbyn yr addysg sydd yn eu galluogi i lwyddo hyd eithaf eu potensial.”

Dysgu a chymdeithasu yn sŵn y Gymraeg

Gan gydnabod y sefyllfa unigryw yng Ngwynedd o ran y Gymraeg, mae’n cydnabod nad mewn addysg ffurfiol yn unig y mae’r cyfle i’r Gymraeg fod yn rhan o fywyd plant a phobl ifanc. Mae’n canu clodydd y gwaith sydd eisoes wedi’i wneud gan ysgolion cynradd yng nghyswllt y Siarter Iaith. Ac mae’n gweld cyfle i’r Strategaeth Iaith Uwchradd ehangu ar y gwaith da hwn, er mwyn gweld y Gymraeg yn datblygu’n “gyfrwng cymdeithasol, naturiol, byw” y tu hwnt i’r ysgol, ac yn y cymdogaethau.

Mae Garem Jackson yn gobeithio defnyddio’r swydd bwysig hon i wneud mwy na chynnal y safonau da y mae’n eu gweld eisoes yn ysgolion Gwynedd. Mae hefyd yn dymuno codi’r safonau er budd pawb, a sicrhau bod y plant yn mwynhau eu haddysg. A phwy ag ŵyr, drwy wneud hynny, a fydd yn annog awdurdodau lleol eraill ei ddilyn ôl ei draed?

Mae Garem Jackson yn olynu Arwyn Thomas, sydd bellach yn Rheolwr-gyfarwyddwr GwE. Dechreuodd ar ei swydd ar 9 Tachwedd, a bydd yn gweithio’n bennaf o Gaernarfon.

 

Cafodd y swydd hon ei hysbysebu ar Golwg 360 ac yng nghylchgrawn Golwg.

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd