Mae milwyr Syria wedi ymosod ar un o faestrefi’r brifddinas Damascus heddiw, meddai ymgyrchwyr.
Daw’r ymosodiadau diwrnod ar ôl i Gyngor Diogelwch y Cenhedloedd Unedig anfon rhagor o arolygwyr i’r wlad yn y gobaith o gadw’r heddwch yno.
Mae’r brwydro fel arfer yn dod i stop pan mae’r arolygwyr yn bresennol, ond mae yna adroddiadau cyson am fomio a saethu mewn rhannau eraill o’r wlad.
Dywedodd yr ymgyrchydd Mohammed Saeed bod dau o bobol wedi eu lladd gan saethu yn ardal Douma.
Roedd brwydro ffyrnig rhwng milwyr a gwrthryfelwyr yno cyn dechrau cadoediad byrhoedlog wythnos yn ôl.
Mae adroddiadau hefyd bod trydydd person wedi ei ladd dros nos ym mhentref Hteita y tu allan i Ddamascus.
“Mae anfon arolygwyr y Cenhedloedd Unedig yma yn jôc,” meddai Mohammed Saeed. “Mae’r bomio yn dod i ben a’r tanciau yn cael eu cuddio am ychydig oriau, ond yna mae’r brwydro yn parhau unwaith y maen nhw wedi troi eu cefnau.”
Y gred yw bod dros 9,000 o bobol wedi eu lladd ers dechrau’r gwrthryfel ym mis Mawrth 2011.
