Donald Trump yn cymryd tabledi malaria i’w warchod rhag y coronafeirws

 
Donald Trump

Donald Trump

Llun: Commons-wicipedia-CC0.jpg

Mae Donald Trump, Arlywydd yr Unol Daleithiau, yn dweud iddo gymryd tabledi malaria i’w warchod rhag y coronafeirws – er gwaethaf cyngor ei lywodraeth ei hun.

Yn ôl Llywodraeth yr Unol Daleithiau, ddylai neb gymryd y tabledi y tu allan i’r ysbyty neu ganolfan ymchwil, a hynny oherwydd sgil effeithiau’r cyffur sy’n gallu lladd yn yr achosion mwyaf difrifol.

Fe ddywedodd Donald Trump wrth ohebwyr ei fod e wedi bod yn cymryd y tabledi “ers tua wythnos a hanner”, ar ôl bod yn canu ei glodydd yn groes i gyngor arbenigwyr.

Does dim tystiolaeth ar hyn o bryd fod y cyffur yn gallu trin y coronafeirws, ac mae Donald Trump yn dweud fod ffisegydd yn y Tŷ Gwyn wedi rhoi’r cyffur iddo.

“Fe wnes i ddechrau ei gymryd oherwydd dw i’n credu ei fod e’n dda,” meddai.

“Dw i wedi clywed tipyn o straeon da.”

Mae arbenigwyr yn y Tŷ Gwyn yn dweud bod manteision y cyffur yn fwy buddiol nag y mae’r anfanteision yn niweidiol.

Mae Donald Trump yn dweud ei fod “yn iawn hyd yn hyn”.

Ymateb

Mae’r Democratiaid yn dweud bod sylwadau Donald Trump yn “beryglus”, ac mae’r Seneddwr Chuck Schumer yn dweud ei fod e’n “dweud celwyddau’n nodweddiadol”.

Mae dau aelod o staff Donald Trump wedi profi’n bositif ar gyfer y feirws ac mae sawl aelod o staff wedi bod yn hunanynysu.

Ers hynny, mae’n rhaid i staff wisgo mygydau dros eu hwynebau ac mae Donald Trump, ei ddirprwy Mike Pence a phobol sy’n dod i gysylltiad â nhw’n rheolaidd yn cael eu profi’n ddyddiol.

Mae meddygon yn dweud eu bod nhw’n gofidio bod sylwadau Donald Trump yn cael eu dehongli fel neges fod y cyffuriau malaria yn ddiogel ac yn llwyddiannus.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn