Atal Julian Assange rhag gweld tystiolaeth mewn achos estraddodi

 

Julian Assange

Llun: Cancillería del Ecuador CC SA 2.0 trwy Gomin Wicimedia

Mae llys wedi clywed bod Julian Assange wedi cael ei atal rhag cael mynediad i dystiolaeth yn ei achos estraddodi.

Aeth sylfaenydd WikiLeaks gerbron ynadon Westminster trwy gyswllt fideo ddoe (dydd Gwener, Rhagfyr 13) wrth i’w achos estraddodi barhau.

Mae’n cael ei gadw yn y ddalfa yng ngharchar Belmarsh yn Llundain ar hyn o bryd.

Fe fydd gwrandawiad llawn yn cael ei gynnal ym mis Chwefror, lle bydd e’n brwydro yn erbyn cael ei estraddodi i’r Unol Daleithiau.

Mae’n wynebu 18 o gyhuddiadau, gan gynnwys cynllwynio i ymyrryd â chyfrifiaduron ac mae wedi’i amau o gydweithio â Chelsea Manning, cyn-swyddog cudd-wybodaeth y fyddin Americanaidd i gyhoeddi cannoedd o ddogfennau cyfrinachol.

Yr amddiffyniad

Ar ddechrau’r gwrandawiad diweddaraf, fe gyfeiriodd gweithiwr y llys ato fel brodor o Sweden, ac fe ddywedodd mai dinesydd o Awstralia oedd e.

Dywedodd ei gyfreithiwr nad oedd e wedi cael mynediad i dystiolaeth yn ei erbyn, a bod hynny’n gwneud y gwaith o baratoi yn fwy anodd i’r cyfreithwyr.

Mae carchar Belmarsh wedi’i gyhuddo o flaenoriaethu ymweliadau’r teulu dros ymweliadau cyfreithiol, a bod angen mynd i’r afael â hyn.

Ond dywedodd y barnwr nad oes ganddi rym i ymyrryd, er iddi ddweud y byddai’n “ddefnyddiol” pe bai’r cyfreithwyr yn cael mynediad i’w cleient.

Fe fu’r cyfreithwyr yn dadlau eisoes nad oedd cyfrifiadur y carchar yn ddigon addas.

A daw’r pryderon ar ôl i feddygon fynegi pryder mewn llythyr at y Swyddfa Gartref y gallai farw yn y carchar oni bai ei fod e’n derbyn triniaeth feddygol frys.

Mae’r meddygon wedi codi amheuon am ei iechyd pe bai’n sefyll ei brawf cyn derbyn triniaeth.

Cafodd ei garcharu am 50 wythnos ym mis Mai am geisio lloches yn llysgenhadaeth Ecwador er mwyn osgoi cael ei estraddodi i Sweden i wynebu cyhuddiadau rhyw mae’n eu gwadu.

Fis diwethaf, daeth awdurdodau Sweden â’r ymchwiliad hwnnw yn ei erbyn i ben.

Bydd y gwrandawiad nesaf yn cael ei gynnal ddydd Iau (Rhagfyr 19).

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn