“Mae Rwsia yn peri bygythiad difrifol i’r byd”

Mae Rwsia yn peri “bygythiad difrifol i’r byd” trwy anwybyddu cyfreithiau rhyngwladol, yn ôl yr Ysgrifennydd Datblygiad Rhyngwladol.

Mewn cynhadledd yr wythnos hon, mi fydd Penny Mordaunt yn cyhuddo Mosgow o annog Arlywydd Syria, Bashar Assad, i gyflawni troseddau hawliau dynol.

Bydd y gweinidog hefyd yn apelio am “ddatrysiad gwleidyddol” i’r “dioddefaint yn Syria”.

Yr Undeb Ewropeaidd a’r Cenhedloedd Unedig fydd yn cadeirio’r gynhadledd ym Mrwsel, ar ddydd Mawrth (Ebrill 24) a dydd Mercher (Ebrill 25).

“Bygythiad difrifol”  

“Mae Rwsia yn peri bygythiad difrifol i’r drefn fydol trwy anwybyddu cyfreithiau rhyngwladol,” bydd y gweinidog yn dweud ddydd Mercher.

“Trwy atal pleidlais 12 o weithiau yn Syria, mae [Rwsia] wedi galluogi Assad i gyflawni troseddau hawliau dynol yn erbyn pobol ei hun.”