Mae 44 o bobol wedi marw ar ôl i awyren lanio ar briffordd yng ngogledd-orllewin Rwsia.

Glaniodd yr awyren mewn niwl trwchus ac yna mynd ar dân, wedi i oleuadau’r llain lanio gerllaw ddiffodd.

Goroesodd wyth o bobol, gan gynnwys hogyn 10 oed ac un o staff yr awyren, y trychineb. Maen nhw mewn cyflwr difrifol yn ysbyty Petrozavodsk.

Roedd yr awyren Tu-134, oedd yn eiddo i gwmni RusAir, ar ei ffordd o Moscow i ddinas Petrozavodsk, meddai’r Gweinidog Argyfwng Oksana Semyonova.

Ychwanegodd Oksana Semyonova fod yr awyren wedi chwalu tua milltir o faes awyr  Petrozavodsk.

Doedd hi ddim yn amlwg a oedd yr awyren wedi ceisio glanio ar y ffordd neu wedi digwydd syrthio yno, meddai.

Mae Petrozavodsk yn rhanbarth Karelia, ger y ffin â Ffindir, tua 400 milltir i’r gorllewin o Moscow.

Dywedodd cyfarwyddwr y maes awyr, Alexei Kuzmitsky, fod y “tywydd yn anffafriol”.

Roedd yr awyren yn cario 52 o bobol, gan gynnwys naw aelod o staff. Roedd un o ddyfarnwyr Uwch Gynghrair Rwsia, Vladimir Pettay, a dyn o Sweden ymysg y rheini fu farw.