Mae newyddion ar-lein yn fwy poblogaidd na phapurau newydd yn America bellach, wrth i ddyfeisiadau fel smartphones a thabledau electronig ddod yn fwy cyffredin.
Yn ôl sefydliad ymchwil yn America, fe wnaeth newyddion teledu, papurau newydd, radio a chylchgronau golli gwylwyr, gwrandawyr a darllenwyr y llynedd – ond fe gynyddodd y nifer a oedd yn darllen newyddion ar-lein 17% o gymharu â’r flwyddyn cynt.
Am y tro cyntaf erioed, mae canran uwch o bobl yn dweud eu bod yn cael newyddion ar-lein o leiaf deirgwaith yr wythnos nag sy’n darllen papurau newydd.
Fe ddywedodd 41% o Americanwyr ym mis Rhagfyr eu bod nhw’n cael y rhan fwyaf o’u newyddion am faterion cenedlaethol a rhyngwladol ar y rhyngrwyd.
Mae newyddion ar-lein yn ail yn unig i newyddion teledu lleol fel y cyfrwng newyddion mwyaf poblogaidd – ac mae disgwyl y bydd yn curo hwnnw hefyd maes o law.
Fe ddaw’r wybodaeth o wythfed arolwg blynyddol cyflwr cyfryngau newyddion gan y Project for Excellence in Journalism.
