Miliwn o ffoaduriaid De Swdan wedi cyrraedd Uganda

 


Mae nifer y ffoaduriaid o Dde Swdan sy’n ceisio lloches yn Uganda wedi cynyddu i filiwn o bobol, yn ôl y Cenhedloedd Unedig, gyda’r argyfwng yn tyfu ar raddfa heb ei debyg o’r blaen.

Dywed swyddogion yn Uganda eu bod nhw wedi’u llethu gan nifer y bobol sy’n dianc rhag rhyfel cartref De Swdan.

Mae asiantaeth ffoaduriaid y Cenhedloedd Unedig wedi galw ar y gymuned ryngwladol i roi mwy er mwyn helpu’r bobol.

Ar gyfartaledd, mae tua 1,800 o ffoaduriaid De Swdan wedi bod yn cyrraedd Uganda bob dydd dros y 12 mis diwethaf, meddai’r asiantaeth. 

Mae tua miliwn arall o bobol y wlad yn ceisio lloches yn y Swdan, Ethiopia, Cenia, Congo a Gweriniaeth Canolbarth Affrica.

“Mae pobol sy’n cyrraedd yma yn siarad am drais barbaraidd, gydag adroddiadau am grwpiau yn llosgi tai i lawr sydd â phobol ynddynt, pobol yn cael eu lladd o flaen aelodau eu teulu, menywod a merched yn dioddef ymosodiadau rhywiol a bechgyn yn cael eu herwgipio a’u gorfodi i ymladd,” meddai datganiad y Cenhedloedd Unedig.

“Gyda ffoaduriaid yn dal i gyrraedd yn eu miloedd, mae’r cymorth rydym yn gallu darparu yn gynyddol brin.” 

Diffyg arian

Er i Uganda ym mis Mehefin geisio codi’r ddau biliwn o ddoleri [£1.5bn] sydd ei angen, dim ond ffracsiwn o hynny gafodd ei godi.

Yn ôl y Cenhedloedd Unedig, mae angen 674 miliwn o ddoleri [£523m] i gefnogi’r ffoaduriaid yn Uganda eleni, ond dim ond pumed o hynny sydd wedi’i dderbyn.

Mae angen yr arian i ddarparu gwasanaethau sylfaenol, sy’n cynnwys stocio clinigau â meddyginiaethau a sefydlu ysgolion.

Yn ôl asiantaethau, mae meintiau dosbarthiadau yn yr ysgolion sydd ar gael yn aml yn fwy na 200 o ddisgyblion.

Mae’r ymladd yn parhau yn Ne Swdan rhwng y llywodraeth a rebeliaid – mae’r Cenhedloedd Unedig yn dweud bod y ddwy ochr yn euog o lofruddio a threisio dinasyddion.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Tywysogion Cymru – pa rai sy’n werth eu cofio?