Mae newyddiadurwraig o’r Swistir wedi marw yn dilyn ffrwydrad yn ninas Mosul yn Irac.
Roedd Veronique Robert yn gohebu ar hanes Daesh – neu’r ‘Wladwriaeth Islamaidd’ – pan ddigwyddodd y ffrwydrad ddechrau’r wythnos.
Bu farw yn yr ysbyty ym Mharis heddiw, meddai Llysgenhadaeth Ffrainc.
Cafodd dau o’i chydweithwyr, Bakhtiyar Haddad a Stephen Villeneuve eu lladd hefyd.
Mae’r brwydro wedi para wyth mis wrth i luoedd Irac geisio gwthio Daesh allan o’r ddinas.
Dyma’r trydydd tro ers mis Hydref i newyddiadurwyr gael eu lladd yn yr ardal.
Mae lle i gredu bod 100,000 o drigolion Mosul yn cael eu defnyddio ar hyn o bryd i warchod Daesh drwy fod yn dariannau dynol iddyn nhw.