Lenin Moreno
Mae Lenin Moreno wedi tyngu llw yn arlywydd Ecwador, gan addo i wella rhaniadau wedi degawd o lywodraeth yr adain chwith.
Fe gafodd ei wneud yn arlywydd swyddogol yn ystod seremoni yng nghyngres Ecwador flaen 12 o arweinyddion gwledydd eraill America Ladin.
Mae disgwyl i’r llywodraeth newydd agor deialog â’r sector preifat, yn wahanol i’r rhagflaenydd a mentor gwleidyddol, Rafael Correa, oedd yn cadw draw.
Mae sawl person busnes wedi cael eu cynnwys yng nghabinet yr arlywydd newydd, gan gynnwys aelod o’r teulu Noboa, sy’n un o deuluoedd cyfoethocaf Brasil, fel gweinidog masnachu.
Cafodd wyth dynes eu penodi hefyd, gan gynnwys y gweinidog tramor a llywydd y banc canolog.
“Ni all deialog ddigwydd heb ryddid mynegiant,” meddai Lenin Moreno, sy’n cael ei weld fel ymgais i gymodi â chyfryngau’r wlad oedd yn dan y lach yn ystod gweinyddiaeth Rafael Correa.
Yr etholiad
Fe gurodd Lenin Moreno y banciwr ceidwadol, Guillermo Lasso, o drwch blewyn yn yr etholiad oedd yn cael ei weld fel refferendwm ar ‘Chwyldro Dinasyddion’ Rafael Correa.
Lenin Moreno oedd dirprwy arlywydd cyntaf Rafael Correa.
Mae’r cyn-arlywydd wedi ymddeol ond mae wedi dweud ei fod yn barod i redeg eto am yr arlywyddiaeth pe bai problemau economaidd Ecwador yn dwysáu.
