Barack Obama yn cosbi Rwsia am hacio adeg etholiad
Mae Arlywydd yr Unol Daleithiau, Barack Obama, wedi gosod sancsiynau ar wasanaethau gwybodaeth Rwsia a’i swyddogion, gan hel 35 o’r swyddogion hynny o ganolfannau Rwsia yn yr Unol Daleithiau.
Dyna’r gosb, meddai, am hacio cyfrifiaduron yn ystod yr etholiad arlywyddol yn America eleni – a dyma hefyd y gweithredu cryfa’ gan weinyddiaeth Obama yn erbyn unrhyw fath o ymosod seibr.
“Fe ddylai pawb yn America gael ei ddychryn gan y modd y mae Rwsia wedi gweithredu,” meddai Barack Obama. “Mae gan weithredu o’r fath oblygiadau.”
Mae Barack Obama wedi gorchymyn y sanciynau yn erbyn dau wasanaeth gwybodaeth Rwsia, y GRU a’r FSB, yn ogystal â chwmnïau y mae’r Unol Daleithiau yn dweud sy’n gefnogol i GRU.
Mae’r arlywydd hefyd wedi gosod sancsiynau ar bennaeth y GRU, y Cadfridog Korobov, a thri o’i ddirprwyon; yn ogystal ag Alexei Belan a Yevgeny Bogachev, dau Rwsiad y mae’r FBI wedi bod yn chwilio amdanyn nhw ers blynyddoedd.
