Boris Johnson dan bwysau i sacio ei brif ymgynghorydd

Diweddarwyd  

Boris Johnson

Llun: Wicipedia

Mae’r Prif Weinidog Boris Johnson o dan bwysau i sacio ei brif ymgynghorydd Dominic Cummings.

Roedd yr ymgynghorydd dadleuol wedi torri rheoliadau gwarchae’r coronafeirws trwy deithio 260 o filltiroedd i gartref ei rieni er ei fod ef ei hun yn dioddef o’r haint ar y pryd.

Daw’r galwadau ar iddo ymddiswyddo wrth i’r cyhoedd wynebu gŵyl banc arall wedi eu gwahanu oddi wrth eu teuluoedd a’u ffrindiau.

Yn ôl ymchwiliad ar y cyd gan y Daily Mirror a’r Guardian, roedd Dominic Cummings wedi gadael Llundain ar gychwyn y gwarchae i deithio i Durham.

Mewn datganiad, dywedodd heddlu Durham:

“Ddydd Mawrth, 31 Mawrth, cafodd ein swyddogion adroddiadau am unigolyn a oedd wedi teithio o Lundain i Durham a’i fod yn aros mewn cyfeiriad yn y ddinas.

“Fe wnaeth perchnogion yr eiddo gadarnhau bod yr unigolyn hwnnw yn bresennol a’i fod yn hunan-ynysu mewn rhan o’r tŷ.

“Yn unol â chanllawiau cenedlaethol yr heddlu, esboniodd plismyn i’r teulu y trefniadau ynghylch canllawiau hunan-ynysu ac ailadrodd y cyngor priodol ynghylch teithio hanfodol.”

Dywedodd y cyn-AS Ceidwadol David Lidington, a oedd yn ddirprwy brifweinidog answyddogol o dan Theresa May fod y newyddion yn codi cwestiynau difrifol y bydd yn rhaid i’r Prif Weinidog eu hateb.

“Mae stori fel hon am effeithio ar barodrwydd y cyhoedd i ddilyn canllawiau’r Llywodraeth yn gyffredinol,” meddai.

Dywedodd arweinydd yr SNP yn San Steffan, Ian Blackford, fod safle Dominic Cummings yn ‘gwbl anghynaliadwy’.

“Rhaid iddo ymddiswyddo neu gael ei sacio,” meddai.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn