Galw am warchod hawliau gweithwyr hunangyflogedig

 

Llun: CC0

Mae Llywodraeth Prydain yn cael eu rhybuddio fod angen gwarchod hawliau gweithwyr hunangyflogedig, wrth i nifer cynyddol ohonyn nhw golli eu bywoliaeth yn sgil y coronafeirws.

Yn ôl Siambr Fasnach Prydain, mae bywoliaeth miloedd o weithwyr hunangyflogedig yn “diflannu”, ac maen nhw’n galw ar weinidogion i gynnig cefnogaeth iddyn nhw, yn dilyn cyhoeddiad gan y Canghellor Rishi Sunak yr wythnos ddiwethaf y byddai gweithwyr cyflogedig yn derbyn cymorth.

‘Ychydig iawn o sicrwydd’

“Mae siambrau ledled y Deyrnas Unedig yn clywed gan filoedd o fasnachwyr unigol y mae’r mesurau yr wythnos ddiwethaf yn cynnig ychydig iawn o sicrwydd iddyn nhw,” meddai Dr Adam Marshall, cyfarwyddwr cyffredinol Siambr Fasnach Prydain.

“Tra ein bod ni’n deall y cymhlethdod cysylltiedig, mae yna bum miliwn o bobol hunangyflogedig sydd angen cymorth tebyg ei raddfa a sgôp i’r hyn a gafodd ei gyflwyno ar gyfer cwmnïau mawr dros y dyddiau diwethaf.

“Byddwn ni’n cydweithio’n agos â gweinidogion i ddod o hyd i ffordd o gynnig cefnogaeth i bobol hunangyflogedig ac i sicrhau bod y mesurau sydd wedi’u cyhoeddi ar gyfer busnesau mwy yn cyrraedd y rheng flaen yn gyflym.”

Ymateb undebau

Un o’r undebau sy’n galw am sicrhau cefnogaeth i weithwyr hunangyflogedig yw’r NUJ, yr undeb sy’n cynrychioli newyddiadurwyr.

“Rhaid i weithwyr llawrydd beidio â chael eu hanghofio yn ystod ymdrechion y Llywodraeth i warchod pobol sy’n gweithio,” meddai Pamela Morton ar ran yr undeb.

“Eisoes, mae ein haelodau’n gweld gwaith yn diflannu ac maen nhw’n wynebu dioddef caledi go iawn.

“Rhaid i’r Canghellor gamu i fyny gyda phecyn ystyrlon a fydd yn galluogi ein haelodau i weithio neu i’w hariannu nhw yn ystod cyfnod pan nad oes ganddyn nhw waith.

“Rydym yn gweithio’n ddiflino er mwyn sicrhau cytundeb go iawn i’n haelodau yn ystod trafodaethau â gweinidogion a swyddogion.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn