“Does dim angen i drafodaethau Brexit fod yn gystadleuaeth” – Leo Varadkar

 

Leo Varadkar, Taoiseach Iwerddon

Llun: Llywodraeth Estonia

Mae Leo Varadkar, Taoiseach neu brif weinidog Iwerddon, yn rhybuddio nad yw trafodaethau Brexit yn gystadleuaeth lle mae un ochr yn ennill a’r llall yn colli.

Ar ôl cyfarfod â Michel Barnier, prif drafodwr Brexit yr Undeb Ewropeaidd, yn Nulyn mae’n dweud y gallai’r ddwy ochr yn hawdd iawn gydweithio er mwyn taro bargen sydd o fudd i bawb.

Mae hefyd yn dweud y bydd lle am byth i’r Deyrnas Unedig wrth fwrdd yr Undeb Ewropeaidd pe na bai Brexit yn llwyddo yn y pen draw.

Daw sylwadau Leo Varadkar wrth iddo amddiffyn ei sylwadau blaenorol, lle gwnaeth e gymharu’r trafodaethau â gêm bêl-droed a dweud mai gan yr Undeb Ewropeaidd fyddai’r “tîm cryfaf”.

“Dw i ddim yn meddwl fod rhaid i ni ei hystyried yn gystadleuaeth,” meddai.

“Mae yna bosibilrwydd y gallen ni gydweithio â’r Deyrnas Unedig dros y misoedd nesaf a sefydlu perthynas a chytundeb masnach yn y dyfodol sydd o fudd i’r ddwy ochr, a dyna’r ysbryd fydd gyda ni wrth ddechrau ar y trafodaethau hyn.”

Barn yr Undeb Ewropeaidd

Yn ôl Michel Barnier, fe fydd holl aelodau’r Undeb Ewropeaidd yn derbyn mandad drafft fis nesaf ar drothwy Uwchgynhadledd Cyngor yr Undeb Ewropeaidd, lle bydd safbwynt terfynol y gwledydd sy’n aelodau’n cael ei gymeradwyo.

Mae’n dweud y bydd mynediad y Deyrnas Unedig i’r farchnad sengl yn ddibynnol ar ei hymrwymiad i gydymffurfio â rheoliadau Ewropeaidd.

“Mae’n bryd cynnal yr ail rownd,” meddai.

“Mae’r cyfnod hwn yn un byr iawn, does dim amser i’w golli mewn unrhyw wleidyddiaeth.

“Dw i bob amser wedi cydweithio’n barchus â phawb yn y Deyrnas Unedig a bydda i’n parhau [i wneud hynny].”

‘Safbwynt Iwerddon yn gryfach na’r Deyrnas Unedig’

Yn ôl Leo Varadkar, mae Iwerddon mewn sefyllfa gryfach na’r Deyrnas Unedig yn y trafodaethau.

“Mae’r Undeb Ewropeaidd yn undeb o 27 o wladwriaethau sy’n aelodau,” meddai wrth y BBC.

“Un wlad yn unig yw’r Deyrnas Unedig.

“Ac mae gyda ni boblogaeth a marchnad o 450 miliwn o bobol. Yn y Deyrnas Unedig, mae e oddeutu 60 miliwn.

“Felly pe baen nhw’n ddau dîm yn chwarae pêl-droed yn erbyn ei gilydd, pwy ydych chi’n credu fyddai â’r tîm cryfaf?”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones