Mudiad cenedlaetholgar Cernyw “mewn sefyllfa letchwith”

Diweddarwyd  
Baner Cernyw

Baner Cernyw

Llun: Wicipedia

Mae’r rheiny sydd am weld pŵer yn cael ei ddatganoli i Gernyw yn wynebu “sefyllfa letchwith”.

Dyna farn, Dick Cole, arweinydd plaid Mebyon Kernow (Meibion Cernyw yn Gymraeg) a Chynghorydd ar Gyngor Cernyw.

Mae’n egluro bod ei blaid yn ymgyrchu tros gael Cynulliad i Gernyw, ac mae’n credu y byddai Deyrnas Unedig “fwy ffederal” yn “beth ffantastig”.

Er bod “rhai pobol” yng Nghernyw, meddai, eisiau annibyniaeth lwyr, dyw’r blaid ddim yn ymgyrchu tros hynny. Ac mae’n dweud bod eu hamcanion yn “eithaf uchelgeisiol” ta beth.

Cafodd cyngor Cernyw ei ddiwygio deg blynedd yn ôl, a phryder Dick Cole yw bod hynny wedi tanseilio’r gobeithion am Gynulliad.

“Mae pobol yn ceisio esgus bod y cyngor yn fwy na chyngor,” meddai wrth golwg360.

“Mae’r pleidiau Llundeinig yn manteisio ar hynny, ac yn gwrthod cefnogi datganoli go iawn – Cynulliad Cernywaidd. Yn wahanol i Gymru a’r Alban, rydym mewn sefyllfa ofnadwy.

“Pan rydych yn siarad am ddatganoli yng Nghernyw, yn aml mae yng nghyd-destun [Cyngor] Cernyw.

“Yn hytrach na thrafod datganoli pwerau go iawn o Lundain, mae pobol yn canolbwyntio ar ddatganoli pwerau tros dai bach cyhoeddus i gynghorau cymuned.”

Agweddau

Mae pobol Cernyw yn cefnogi datganoli yn ôl Dick Cole, ac mae’n cyfeirio at ymgyrch o’r gorffennol.

Mae’n sôn am ddeiseb a gafodd ei lofnodi gan 50,000 o bobol yn 2001 yn galw am Gynulliad i Gernyw, ac mae’n galw hynny yn “gyrhaeddiad ffantastig.”

Er hynny, mae’n cydnabod bod mudiad cenedlaetholgar Cernyw yn wannach nag y mae yng Nghymru.

“Dyw e ddim wedi cael traction ledled y Deyrnas Unedig,” meddai. “Ond yng Nghernyw, mae’r rhan fwyaf o bleidiau yn defnyddio terminoleg datganoli.

“…Ledled Cernyw mae pobol yn derbyn y dylai penderfyniadau gael eu gwneud yn lleol. Er hynny, mae rhai yn dadlau nad oes angen rhagor o wleidyddion arnom.”

Roedd Dick Cole yn fyfyriwr yn Llambed yn yr 1980au, ac mae’n dweud bod pobol Cernyw yn teimlo agosatrwydd at eu brodyr Celtaidd: “Rydym yn meddwl yn fawr o Gymru.”

Gwleidyddiaeth

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer