Mae newyddion cymysg i archfarchnadoedd gwledydd Prydain wrth iddyn nhw gyhoeddi eu ffigurau ariannol diweddaraf.
Tra bod Morrisons wedi cyhoeddi cynnydd o 3.6% yn eu gwerthiant dros y naw wythnos hyd at Ionawr 6, mae gwerthiant marsiandiaeth Sainsbury’s i lawr 2.3% a gwerthiant dillad i lawr 0.2%.
Mae cyfrannau Sainsbury’s wedi gostwng 1% yn dilyn y cyhoeddiad.
Yn ôl penaethiaid, mae cwsmeriaid wedi bod yn fwy gofalus gyda’u harian na’r arfer yn ystod y cyfnod diwethaf.
Dydy ffigurau Tesco ddim wedi dod i law hyd yn hyn.
Greggs
Un cwmni sydd wedi profi llwyddiant sylweddol yn ystod y cyfnod diwethaf yw Greggs.
Mae’r cwmni’n disgwyl cyhoeddi elw blynyddol o £88m, sydd ychydig yn uwch na’r rhagolygon blaenorol.
Roedd gwerthiant y cwmni hyd at Ragfyr 29 i fyny 7.2%.
Mae cyfrannau’r cwmni i fyny 5% erbyn hyn.
Mae’r cwmni wedi gweld cryn gynnydd yn ei boblogrwydd dros yr wythnosau diwethaf yn sgil cyflwyno sosej rôl figan at ei nwyddau.
