Nicola Sturgeon yn gweld cyfle marchnad sengl yng nghynllun Chequers

 
Nicola Sturgeon o flaen darllenfa a dau feic

Nicola Sturgeon

Llun: Vimeo trwy Commons Wikimedia

Mae Nicola Sturgeon yn dweud ei bod hi’n her, ond nid yn amhosib, i’r ymgyrchwyr hynny sydd am gadw’r Deyrnas Unedig oddi fewn i’r Farchnad Sengl a’r undeb tollau yn dilyn Brexit.

Mae prif weinidog yr Alban yn dweud fod y cytundeb a luniwyd gan Theresa May a’i chabinet yn Chequers ddoe (dydd Gwener, Gorffennaf 6) yn gadael y drws yn agored ar gyfer Prydain sydd wedi’i chlymu’n agos at Ewrop.

Mae’r cynllun – sydd eto i dderbyn sêl bendith y 27 o wledydd eraill yr Undeb Ewropeaidd – yn argymell creu ardal ‘UK-EU’ ar gyfer masnach rydd rhwng y ddau le, ac ardal a fyddai’n dilyn “yr un llyfr rheolau cyffredin”.

Yn y cyfamser, fe fyddai “cytundeb tollau” rhwng y Deyrnas Unedig a’r Undeb Ewropeaidd yn cael gwared â’r angen am wirio a rheolaeth – yn hytrach, fe fyddai’r cytundeb yn drin y ddau le fel pe baen nhw’n “un diriogaeth o safbwynt tollau”.

“Mae yn y cytundeb yma fwy o realaeth nag yr ydan ni wedi’i weld gan lywodraeth Prydain cyn hyn,” meddai Nicola Sturgeon, wrth ymateb i ganlyniad y trafodaethau hirfaith yn Chequers. “Er hynny,” meddai wedyn, “dydan ni ddim yn cael gwybod llawer ganddyn nhw chwaith.”

“Yr hyn sy’n fy mhoeni i ydi fod y cynllun yn ymddangos fel bod llywodraeth Prydain yn dewis y rhannau gorau, y pethau y maen nhw’n eu hoffi am Ewrop, ac yn gwrthod y gweddill… Mae pethau’n fwy cymhleth na hynny, ac mi fydd gan yr Undeb Ewropeaidd lwyth o gwestiynau nad ydi’r cynllun hwn yn eu hateb.

“Ond, efallai mai’r prif bwynt ydi hyn – os mai dyma fydd man cychwyn y Deyrnas Unedig yn y trafodaethau, mae o’n sicr yn cynnig cyfle go iawn i’r rheiny sy’n dymuno gweld canlyniad sy’n cynnwys marchnad sengl gyflawn ac undeb tollau…”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed