Mae achosion o esgeuluso plant hŷn yn aml yn cael ei anwybyddu, gan adael i bobol ifanc sydd mewn perygl i lithro drwy’r rhwyd, mae adroddiad yn rhybuddio.
Mae’n awgrymu y gall asiantaethau weld pobol ifanc sydd wedi eu hesgeuluso fel y broblem, yn hytrach nag edrych ar yr hyn a allai fod yn achosi eu hymddygiad.
Mae’r adroddiad ar y cyd, a gyhoeddwyd gan grŵp o gyrff gwarchod cyhoeddus, yn dweud bod angen gweithredu er mwyn sicrhau bod y bobl ifanc hyn yn cael y gefnogaeth sydd ei angen arnyn nhw.
“Efallai y bydd arwyddion esgeulustod plant hŷn yn fwy anodd ei hadnabod nag arwyddion o esgeulustod mewn plant iau, a gall plant hŷn fod â risgiau gwahanol,” rhybuddia’r adroddiad.
“Mae’r hyn y mae plant hŷn yn ei gwneud yn ofynnol i’w rhieni hefyd yn wahanol i’r hyn y mae ar blant ei angen. Mae plant hŷn yn wynebu risgiau y tu allan i’r cartref mewn ffyrdd nad yw plant iau yn eu gwneud.
“Efallai na fydd rhieni bob amser yn barod i helpu eu plant hŷn i ddelio â mwy o beryglon y tu allan i’r cartref. Fel arall, oherwydd bod eu rhieni yn eu hesgeuluso gartref, efallai y bydd plant hŷn yn treulio mwy o amser i ffwrdd o’r cartref, sy’n cynyddu’r risg o fod yn agored i ecsbloetio rhywiol, ecsbloetio troseddol, neu weithgaredd sy’n gysylltiedig â thrais.
“Y rhain, yna, yw’r problemau y mae gweithwyr proffesiynol yn eu gweld gyntaf pan fyddant yn dod ar draws plentyn sydd wedi’i esgeuluso ac efallai mai’r rhain yw’r materion y maen nhw’n ymateb iddyn nhw.”
