Fe fydd dinas Lerpwl yn cofio’r 96 o gefnogwyr tîm pêl-droed Lerpwl fu farw yn nhrychineb Hillsborough gyda gwasanaeth coffa ddydd Sul.
Mae’n 29 o flynyddoedd union ers y trychineb ar Ebrill 15, 1989 ar ddiwrnod gêm gyn-derfynol Cwpan yr FA rhwng Lerpwl a Nottingham Forest.
Roedd teyrngedau ddydd Sadwrn wrth i Lerpwl herio Bournemouth. Gwisgodd y chwaraewyr fandiau duon am eu breichiau, ac fe greodd y cefnogwyr furlun yn y dorf er mwyn datgelu’r rhif 96.
Heddiw, fe fydd munud o dawelwch am 3.06pm.
Bydd rhaglenni arbennig yn cael eu darlledu ar sianel deledu Clwb Pêl-droed Lerpwl gydol y dydd.
Y flwyddyn nesaf, ar achlysur 30 o flynyddoedd ers y trychineb, fe fydd gwasanaeth coffa arbennig yn cael ei gynnal yn Anfield ar gais y teuluoedd, sydd wedi bod yn ymgyrchu’n ddiflino ers degawdau am gyfiawnder i’w hanwyliaid.
