Rheolau newydd i daclo achosion aflonyddu yn San Steffan

Gallai Aelodau Seneddol a’r Arglwyddi gael eu diarddel dan sancsiynau newydd er mwyn taclo bwlio ac aflonyddu, meddai adroddiad newydd.

Gwelodd yr adroddiad dystiolaeth fod bron i un o bob pum gweithiwr yn San Steffan wedi dioddef, neu weld, achos o aflonyddu rhywiol yn digwydd dros y flwyddyn ddiwethaf.

Roedd yr arolwg o 1,377 o weithwyr wedi canfod bod dwywaith gymaint o’r achwynwyr yn fenywod.

Fe wnaeth 39% o bobol ddweud eu bod wedi cael eu bwlio dros yr un cyfnod, gan gynnwys 45% o fenywod a 35% o ddynion.

Cod Ymddygiad newydd

Yn ôl adroddiad y grŵp trawsbleidiol, wedi’i gadeirio gan Arweinydd Tŷ’r Cyffredin, Andrea Leadsom, mae angen creu trefn gyfrinachol ar gyfer cwynion, a fyddai’n annibynnol o bleidiau gwleidyddol.

Galwodd hefyd am adolygiad o’r Cod Ymddygiad presennol a chael Cod Ymddygiad newydd ar gyfer San Steffan i gyd.

Dan y drefn newydd, bydd Comisiynydd Safonau San Steffan yn adrodd i’r pwyllgor safonau yn Nhŷ’r Cyffredin a Thŷ’r Arglwyddi er mwyn iddyn nhw argymell gwahardd Aelod am gyfnod penodol.

Gallai hynny danio etholiad newydd yn etholaeth yr Aelod Seneddol, os bydd yn cael ei wahardd dan y rheolau newydd.