Swyddog iechyd yn beirniadu taith lori Coca-Cola

 

Llun: W_Minshull CC 2.0 trwy Commons Wikimedia

Mae prif swyddog iechyd Lloegr wedi beirniadu taith lori Coca-Cola am ei bod yn hyrwyddo siwgr ymhlith plant ac yn cynyddu’r perygl o ordewdra a phydru dannedd.

Yn ôl Duncan Selbie, prif weithredwr Iechyd Cyhoeddus Lloegr, dylai awdurodau lleol sy’n croesawu’r lori i’w trefi a’u dinasoedd “ystyried a yw er lles iechyd plant a theuluoedd”.

Mae’r daith yn ei seithfed flwyddyn eleni, ac mae’n ymweld â 42 o drefi neu ddinasoedd rhwng Tachwedd 11 a Rhagfyr 17, gan gynnwys Abertawe a Chaerdydd.

Ond mae pryderon ei bod yn ymweld â nifer o ardaloedd lle mae lefelau gordewdra uchel a safonau hylendid dannedd yn isel.

“Dydi brandiau mawr yn teithio o amgylch y wlad adeg y Nadolig i hysbysebu eu cynnyrch â’r lefelau siwgr uchaf i blant, ac i gynyddu eu gwerthiant, ddim yn gwneud unrhyw beth i helpu teuluoedd i wneud dewisiadau iach nac ymdrechion ehangach i fynd i’r afael â gordewdra a dannedd plant yn pydru,” meddai Duncan Selbie.

Ystadegau

Yn ôl Iechyd Cyhoeddus Lloegr, mae lefelau gordewdra a phydru dannedd 61% o’r trefi ar y rhestr yn uwch na chyfartaledd gwledydd Prydain.

Mae pob can o Coca-Cola yn cynnwys tua saith llwy de o siwgr, yn ôl y cwmni diodydd.

Mae llefarwyr ar ran Cymdeithas Frenhinol Iechyd y Cyhoedd ac Ymgyrch Bwyd Plant hefyd wedi beirniadu’r daith, gan annog Coca-Cola i “ymddwyn yn fwy cyfrifol”.

Serch hynny, mae Coke Zero ar gael ar y daith yn ogystal â Coca-Cola a Diet Coke.

Yn ôl Rhaglen Cenedlaethol Mesur Plant, roedd bron i chwarter o blant oedran dechrau yn yr ysgol a thraean o blant ym mlwyddyn 6 dros eu pwysau neu’n ordew yn 2016-17

Roedd 9.3% o blant oedran dosbarth derbyn ac 20% o blant oedran dechrau yn yr ysgol uwchradd yn ordew.

Ymateb Coca-Cola

Wrth ymateb i’r pryderon, dywedodd llefarydd ar ran cwmni Coca-Cola: “Mae taith lori Nadoligaidd Coca-Cola yn ddigwyddiad unwaith y flwyddyn lle’r ydym yn cynnig dewis i bobol o samplau 150ml o Coca-Cola traddodiadol, Coca-Cola Zero Sugar neu Diet Coke – felly mae dau draean o’r opsiynau’n ddiodydd heb siwgr.”

Dywedodd hefyd fod 70% o’r samplau sydd ar gael ar y daith heb siwgr, ac nad yw’r cwmni’n cynnig samplau i blant dan 12 oed heb fod rhiant neu warcheidwad yn bresennol ac yn rhoi caniatâd.

Ychwanegodd nad yw’r lori yn mynd i’r un ardaloedd dro ar ôl tro.

 

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd