Hillsborough: pump o bobol gerbron llys am y tro cyntaf

 


Fe fydd pump o bobol yn ymddangos gerbron ynadon am y tro cyntaf heddiw i wynebu cyhuddiadau mewn perthynas â thrychineb Hillsborough.

Ar Ebrill 15, 1989, fe arweiniodd y trychineb gwaethaf yn hanes y byd pêl-droed yng ngwledydd Prydain at farwolaeth 96 o gefnogwyr tîm Lerpwl.

Roedden nhw’n chwarae yn erbyn Nottingham Forest yn rownd gyn-derfynol Cwpan FA Lloegr pan gawson nhw eu gwasgu i farwolaeth toc ar ôl y gic gyntaf.

Y rhai sydd wedi’u cyhuddo

Fe fydd Syr Norman Bettison, cyn-Brif Gwnstabl heddluoedd Gorllewin Swydd Efrog a Glannau Mersi, yn ymddangos gerbron ynadon yn Warrington; ynghyd â’r cyn-blismyn Donald Denton ac Alan Foster; cyn-ysgrifennydd Clwb Pêl-droed Sheffield Wednesday, Graham Mackrell; a chyfreithiwr y clwb, Peter Metcalf.

Mae rheolwr yr heddlu ar gyfer y gêm honno, David Duckenfield, yn wynebu 95 o gyhuddiadau o ddynladdiad trwy esgeulustod difrifol. Ond fydd e ddim yn cael ei gyhuddo’n ffurfiol tan bod yr Uchel Lys yn ei ryddhau o achos sifil a gafodd ei ddwyn yn 2000.

Y cyhuddiadau

Mae Norman Bettison wedi’i gyhuddo o bedwar achos o gamymddwyn mewn swydd gyhoeddus mewn perthynas â chelwyddau’n ymwneud â’r trychineb.

Mae Graham Mackrell, oedd hefyd yn swyddog diogelwch y clwb ar y pryd, yn wynebu dau gyhuddiad yn ymwneud â iechyd a diogelwch a thystysgrifau iechyd a diogelwch.

Mae Donald Denton, Alan Foster a Graham Metcalf yn wynebu dau gyhuddiad yr un o weithredu fel eu bod yn gwyrdroi cwrs cyfiawnder ac yn bwriadu gwyrdroi cwrs cyfiawnder. Mae’r cyhuddiadau’n ymwneud ag addasu datganiadau’r heddlu.

Cyhoeddodd Gwasanaeth Erlyn y Goron fis diwethaf na fyddai unrhyw un yn wynebu cyhuddiadau mewn perthynas â marwolaeth Anthony Bland, gan ei fod e wedi marw bedair blynedd yn ddiweddarach a bod yr ymchwiliad yn cael ei gynnal yn unol â’r gyfraith ar y pryd, ac nid y gyfraith bresennol.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed