Mae disgwyl i’r Prif Weinidog David Cameron gyhoeddi cynlluniau heddiw i gynyddu nifer y ffoaduriaid sy’n cael dod i mewn i’r Deyrnas Unedig.
Nid oes sôn am ffigur penodol eto ond mae’r Prif Weinidog wedi dweud yn y gorffennol y bydd y DU yn parhau i dderbyn “miloedd”.
Bydd David Cameron yn gwneud y cyhoeddiad ym Madrid ar ôl trafodaethau gydag arweinwyr Sbaen a Phortiwgal am gynigion Prydain i ddiwygio’r Undeb Ewropeaidd.
Mae disgwyl i’r ffoaduriaid ychwanegol ddod o wersylloedd y Cenhedloedd Unedig yn agos i Syria, ac nid o blith y rhai sydd eisoes yn Ewrop.
Galwadau cynyddol
Mae’r llywodraeth wedi bod dan bwysau i dderbyn rhagor o ffoaduriaid ac fe wnaeth y galwadau ddwysau ar ôl i lun o fachgen tair oed o Syria, Alan Kurdi oedd wedi boddi ar lannau traeth yn Nhwrci ysgwyd y byd.
Anhrefn Budapest
Yn y cyfamser, mae miloedd o ffoaduriaid ym mhrif ddinas Hwngari o hyd. Er i’r awdurdodau yno ail-agor yr orsaf, maen nhw hefyd wedi cyhoeddi na fydd neb yn cael teithio i unrhyw le heb gael eu ‘cofrestru’.
Mae hyn wedi achosi tensiwn mawr yn y brifddinas rhwng y rhai sy’n ceisio am loches a’r heddlu yno.
Croesawu’r ‘tro pedol’
Mae arweinydd Plaid Cymru wedi croesawu penderfyniad y Prif Weinidog,
“Mae’n rhaid croesawu tro pedol y Prif Weinidog. Ni allwn anwybyddu’r creisis hon rhagor,” meddai mewn datganiad.
“Dylai’r Prif Weinidog nawr weithio’n agos gyda llywodraethau datganoledig i sicrhau bod pob un o genhedloedd y DU yn derbyn ei chwota teg o ffoaduriaid. Mae hyn yn fater o argyfwng.”
Ymateb Amnest
Mae’r elusen hawliau dynol, Amnest Rhyngwladol wedi dweud bod penderfyniad y llywodraeth yn ‘gam mawr ymlaen’.
Er hyn, mae’r elusen wedi nodi ei siom nad yw’r llywodraeth wedi gwneud rhywbeth yn gynt.
“Mae bellach pedwar miliwn o ffoaduriaid wedi ffoi o Syria, mae’r rhan fwyaf helaeth yn byw yn Nhwrci, Libanus a gwlad yr Iorddonen, yn aml dan amodau gwael iawn,” meddai Steve Symonds, arbenigwr ffoaduriaid Amnest.
“Mae cymryd ein siâr deg o ffoaduriaid yn hanfodol, dyma’r argyfwng dyngarol mwyaf ers yr ail ryfel byd. Amser a ddengys os bydd David Cameron yn gweithredu ei ymrwymiadau i fynd i’r afael â’r creisis hon.”