Gruff Rhys yn canu cân yn diolch i’r NHS

Diweddarwyd am  

Gruff Rhys

Llun: National Theatre Wales

Mae’r cerddor Gruff Rhys yn rhyddhau cân arbennig yr wythnos hon i nodi pen-blwydd y Gwasanaeth Iechyd Gwladol (NHS) yn 70 oed.

‘No Profit in Pain’ yw ei henw, ac mae’n clodfori’r sefydliad am gynnig help llaw gydol oes i bobol, yn rhad ac am ddim.

Dyna pam y mae’n dweud y gallwn ni, fel Cymry, ymfalchïo “fel cenedl” yn y gwaith a arweiniodd at sefydlu’r Gwasanaeth Iechyd Gwladol (GIG) yn 1948.

“Mae hi’n hawdd i ni gymryd yr NHS yn ganiataol,” meddai Gruff Rhys wrth golwg360. “Dw i’n nabod lot o gerddorion sydd methu fforddio yswiriant ac weithiau pobol sydd methu disgyn yn ôl ar sustem fel hyn.

“Dw i wedi gweld pobol mewn sefyllfaoedd gwael iawn sydd methu fforddio triniaeth, am wahanol resymau. Dw i’n meddwl bod o’n rhywbeth sydd angen ei warchod.

“Mi fasa’n gas gen i feddwl lle faswn ni heb y gwasanaeth yma, ac mewn ffordd mae’n gwbwl amhosib cyfleu’r effaith mae o wedi cael yn uniongyrchol ar fy mywyd i, mewn cân. Ond, dw wedi trio, a dyma hi!”

Moli

“O’r crud i’r bedd / O’r eiliad y cefais fy ngeni, wnes di ofalu amdana’ i a fy nghadw’n gryf / Peidiwch â’i rwygo’n ddarnau,” cana’r cerddor yn Saesneg.

Nid dyma’r tro cynta’ i Gruff Rhys – cyn-aelod o Ffa Coffi Pawb a phrif leisydd y Super Furry Animals – gyfansoddi cân wleidyddol. Fe gyhoeddodd gân serch i Ewrop, ‘I Love EU’, yn dilyn refferendwm Brexit yn 2016.

A dyw Gruff Rhys ddim yn swil o feirniadu busnesau – ac entrepreneurs fel Richard Branson – sy’n gweld eu cyfle i wneud arian allan o ddioddefaint pobol eraill a rhedeg rhannau o’r NHS er mwyn gwneud elw.

“Rhedwch am y mynyddoedd pan welwch chi nhw’n dod,” meddai, cyn canmol Aneurin Bevan, William Price a Betsi Cadwaladr, ymysg eraill, sydd wedi rhoi’r pwyslais ar ofal yn hytrach nag arian.

Mae’r gân ‘No Profit in Pain’ yn cael ei chyhoeddi ar y cyd â National Theatre Wales – corff sy’n cynnal sawl digwyddiad heddiw (Gorffennaf 5) i nodi gweledigaeth y gwleidydd o Dredegar, Aneurin Bevan.

Mae’r gân ‘No Profit in Pain’ i’w gweld a’i chlywed yn llawn yma. Dyddiad swyddogol ei rhyddhau ydi Gorffennaf 7.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Tywysogion Cymru – pa rai sy’n werth eu cofio?