RSS

Golwg360

MwyCau 

Gwefan Gŵyl Rhif 6: “Dim adnoddau ar gyfer tudalen Gymraeg”

Medi 8, 2017 10:43 Diweddarwyd am 10:45


Hwyl yr ŵyl.
Gyda disgwyl i gannoedd o Gymry Cymraeg heidio i Bortmeirion yng Ngwynedd tros y penwythnos, mae trefnwyr Gŵyl Rhif 6 wedi dweud wrth gylchgrawn
Golwg nad ydyn nhw yn medru darparu cynnwys Cymraeg ar eu gwefan.

Mae’r ŵyl yn cael £5,000 gan Gyngor Gwynedd at y gost o roi llwyfan i fandiau lleol, ac mae Cymdeithas yr Iaith yn galw ar y cyngor sir i roi pwysau ar y trefnwyr i ddarparu gwefan ddwyieithog.

“Mae hi’n syndod nad oes unrhyw Gymraeg ar eu gwefan, a chymaint o Gymry Cymraeg yn mynychu’r ŵyl,” meddai Cadeirydd Rhanbarth Gwynedd-Môn Cymdeithas yr Iaith Gymraeg, Menna Machreth.

“Byddai hi’n dda petai Cyngor Gwynedd yn rhoi rhyw amod fod rhaid i bopeth ynglŷn â’r ŵyl fod yn ddwyieithog y flwyddyn nesa’.”

Y farn leol

Mae un o’r trigolion lleol yn cytuno fod angen i’r ŵyl arddel y Gymraeg ar eu gwefan.

“Erbyn hyn mi ddylai’r egwyddor fod wedi ei hen sefydlu bod unrhyw ddigwyddiad yn yr ardal yma yn hysbysebu’n ddwyieithog – ar eu gwefan neu ar bosteri,” meddai Arthur Thomas o Borthmadog wrth gylchgrawn Golwg.

“Waeth iddyn nhw heb â son am gael bandiau Cymraeg os ydi’r awyrgylch yn Saesneg ac ar eu gwefan – does dim pwynt iddyn nhw frolio hynny. Hyd y gwela i, mae eu pethau nhw wedi bod yn ddwyieithog ym Mhortmeirion. Ond dydi o ddim yn esgus i’r cwmni beidio â gwneud y wefan yn ddwyieithog.”

“Dim adnoddau” medd y trefnwyr

“Oherwydd bod cymaint o newidiadau ac ychwanegiadau i’n gwefan, yn anffodus nid oes ganddo ni’r adnoddau i reoli tudalen iaith Gymraeg ar hyn o bryd, ond mae yn rhywbeth yr ydym yn awyddus i edrych arno yn y dyfodol,” meddai llefarydd yr ŵyl.

Mae’r trefnwyr yn awyddus i bwysleisio’r pethau y maen nhw’n eu gwneud i gefnogi’r Gymraeg.

 “Mae hyn yn cynnwys sesiynau ymwybyddiaeth am y Gymraeg a gwersi Cymraeg drwy gydol y penwythnos i’r gwesteion; ymadroddion cyfarwydd Cymraeg yn rhaglen yr ŵyl i annog gwesteion Saesneg i glosio at yr iaith; sticeri punt Cymraeg ar gyfer yr holl gynnyrch a’r stondinau; a phartneriaethau gyda hyrwyddwyr lleol i greu llwyfannau a chyfleoedd i ddoniau Cymreig…

 “R’yn ni wastad yn ceisio gwella Gŵyl Rhif 6 a phrofiad ein gwesteion a byddwn ni’n parhau i chwilio am ffyrdd ymarferol i gyflwyno’r iaith Gymraeg i mewn i’n dulliau cyfathrebu.”

Ymateb Cyngor Gwynedd

“Nid yw deddfwriaeth trwyddedu cenedlaethol yn caniatáu i gynghorau gynnwys amod iaith fel rhan o drwydded safle – sef y drwydded sydd wedi ei rhoi i Ŵyl Rhif 6 er mwyn cynnal yr ŵyl,” meddai llefarydd ar ran Cyngor Gwynedd.

Mwy am y mater a dwy stori arall am Ŵyl Rhif 6 yn rhifyn yr wythnos o gylchgrawn Golwg:

- gwersi cynganeddu Gruffudd Antur ac Elis Dafydd ym Mhortmeirion;

-  hanes fersiwn newydd Côr y Brythoniaid o’r gân ‘Chwarae dy gêm’ gan Anweledig.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.