Pennaeth Newyddion BBC: y Gymraeg yn “ddymunol”

Diweddarwyd am  


Mae hi’n “anhygoel” bod BBC Cymru wedi hysbysebu am Bennaeth Newyddion fydd ddim yn gorfod siarad Cymraeg, meddai Cymdeithas yr Iaith.

Yn ôl ymgyrchwyr, mae hi’n hanfodol bod y pennaeth newydd – a fydd yn arwain ystafell newyddion sy’n cynhyrchu rhaglenni i S4C a Radio Cymru – yn medru siarad Cymraeg yn ogystal â’r Saesneg. Ond nid yw’r Pennaeth Newyddion presennol, Mark O’Callaghan, yn medru’r Gymraeg chwaith.

Fore Mawrth, fe gysylltodd golwg360 gyda BBC Cymru i gyfleu pryderon nad oedd yn hi’n hanfodol nac yn ddymunol i’r Pennaeth Newyddion newydd fedru siarad Cymraeg, yn ol y disgrifiad swydd. Erbyn y pnawn, roedd BBC Cymru yn dweud wrth golwg360 eu bod wedi “gwneud camgymeriad” wrth hysbysebu.

“Fe ddylai’r hysbyseb ar gyfer y swydd hon fod wedi nodi bod y gallu i siarad Cymraeg yn ddymunol, ond ddim yn hanfodol,” meddai llefarydd BBC Cymru.

“Mae’n cael ei newid i adlewyrchu hyn. Ein ffocws yw penodi’r unigolyn gorau posib sydd â’r cyfuniad iawn o sgiliau golygyddol ac arweinyddol.”

Yr hysbyseb gwreiddiol 

Yn eu hysbyseb gwreiddiol roedd BBC Cymru yn dweud eu bod yn chwilio am Bennaeth Newyddion sydd ‘yn gyfrifol am ddarparu newyddion lleol, cenedlaethol a rhynwgwladol ar radio, teledu ac ar-lein – yn Gymraeg ac yn Saesneg – i gynulleidfaoedd yng Nghymru ac ar draws y DU… Nid yw’n hanfodol i siarad Cymraeg ar gyfer y swydd hon’.

Mae’r hysbyseb yn sôn bod angen ‘profiad newyddiadurol helaeth… gyda chrebwyll olygyddol gref… a chefndir amlwg o arwain timau newyddion mawr a chymhleth’.

“Anhygoel”

Ond roedd y ffaith nad oedd y Gymraeg hyd yn oed yn ‘ddymunol’ yn yr hysbyseb gwreiddiol, wedi cynddeiriogi Cymdeithas yr Iaith.

“Mae hyn yn anhygoel,” meddai Carl Morris, Cadeirydd grŵp digidol Cymdeithas yr Iaith Gymraeg.

“Mae’n dangos nad yw’r BBC yn ystyried y Gymraeg yn rhan greiddiol o’u gwasanaethau; ac mae’n adlewyrchu’n wael iawn ar statws y Gymraeg o fewn y gorfforaeth. Mae hanner allbwn y BBC yng Nghymru yn Gymraeg, sut allai rhywun reoli hynny heb fedru’r Gymraeg? Mae gweithwyr y BBC yn haeddu derbyn rheolaeth drwy’r Gymraeg, dyna yw eu hawliau gwaith wedi’r cwbl.

“Mae pobol wedi bod yn cwyno ers blynyddoedd am driniaeth penaethiaid y BBC o’r Gymraeg, ond dyw’r penaethiaid ddim yn newid eu hagwedd.

“Yn sicr, dyw’r BBC ddim yn haeddu rheoli gwasanaethau newyddion S4C. Os ydyn ni’n mynd i gael system ddarlledu sy’n rhoi normaleiddio’r Gymraeg ar frig yr agenda, bydd rhaid ei ddatganoli i Gymru.”

Mewn atodiad i’r hysbyseb, mae’r BBC yn brolio mai dyma ‘sefydliad mwyaf creadigol y byd’, ac mae’r staff ‘yn amrywiol, yn greadigol, yn feddylgar, yn dalentog ac yn chwilfrydig, ac mae angen arweinyddiaeth wych arnynt’.

Ond nid oes yr un gair am yr iaith Gymraeg yn yr atodiad Ein Cenhadaeth a’n Gwerthoedd, nac ychwaith yn y disgrifiad swydd llawn.

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd