RSS

Golwg360

MwyCau 

Alun Davies – “Gall Brexit olygu mwy o wrthdaro dros y Gymraeg”

Mawrth 16, 2017 08:53 Diweddarwyd Mawrth 17, 2017 07:50


Alun Davies, Gweinidog y Gymraeg
Mae Gweinidog y Gymraeg, Alun Davies, wedi dweud ei fod yn poeni y gallai Brexit olygu bod mwy o bobol yn troi yn erbyn y Gymraeg.

Wrth siarad â golwg360, dywedodd y gallai’r Gymraeg fod yn rhan o’r cynnydd gwrthdaro hiliol sydd wedi bod yng Nghymru ers i bobol bleidleisio dros adael yr Undeb Ewropeaidd.

“Dw i’n poeni am Brexit bob dydd, dw i’n credu ei fod yn creu cawlach yn ein gwlad,” meddai Alun Davies am effaith y refferendwm ar yr iaith.

“Ro’n i’n siarad â chriw o bobol pythefnos yn ôl ac roedd y fenyw yn yr ystafell yn dweud bod hi wedi gweld cynnydd yn achosion o fwlio yn yr ysgol, plant du yn cael eu bwlio yn yr ysgol.

“Mae mwy o wrthdaro hiliol mewn ysgolion ac yng ngholegau ac roedd hi’n dweud bod hi’n gweld hyn fel rhyw fath o ymateb i Brexit.

“Brexit wedi dod i ymosod ar y Gymraeg”

“Mae pobol sydd wedi bod yn wrthwynebus i’r Gymraeg, sydd wedi cadw’n dawel dros y blynyddoedd diwethaf – mae Brexit wedi dod nawr iddyn nhw ymosod ar y Gymraeg, mewn ffordd buasen nhw ddim wedi gwneud, efallai blwyddyn, dwy flynedd yn ôl.

“Felly dw i’n gweld y cyfnod presennol fel cyfnod bregus iawn yn ein cymdeithas ni a dw i’n credu bod eisiau pob un ohonom ni i feddwl am yr hyn sy’n digwydd i gymunedau a’r gymdeithas yng Nghymru.

“Dw i’n meddwl y gwelwn fwy o wrthdaro oherwydd Brexit a dw i’n gweld efallai y bydd y Gymraeg yn rhan o hyn.”

Dogfen Plaid Cymru – “ddim yn anodd”

Wrth ymateb i ddogfen Plaid Cymru ar greu miliwn o siaradwyr Cymraeg erbyn 2050, dywedodd ei bod “ddim yn anodd” creu dogfen o’r fath o gymharu ag ysgrifennu strategaeth ar gyfer y 30 mlynedd nesaf.

“Dw i’n croesawu cyfraniadau at y drafodaeth, dw i’n falch bod Plaid Cymru yn cyfrannu at hyn,” meddai.

“Rydan ni’n ysgrifennu strategaeth i’r Llywodraeth, dim rhyw ddogfen ymgyrchu, gall unrhyw un ysgrifennu hynny dros nos. Dyw e ddim yn anodd gwneud, gallwch chi wneud e dros y penwythnos.

“Ond rydyn ni’n gwneud rhywbeth gwahanol iawn, rydyn ni’n gwneud strategaeth ar gyfer Llywodraeth Cymru, ar gyfer y 30 mlynedd nesaf a dw i’n credu bod hynny’n tipyn bach yn fwy o beth.”

Mynnodd nad oes oedi yn y broses o greu strategaeth ar gyfer nod Llywodraeth Cymru o greu miliwn o siaradwyr Cymraeg erbyn 2050.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.