Guto Roberts
Mae’r Fedal Wyddoniaeth a Thechnoleg yr Eisteddfod Genedlaethol eleni yn mynd i ŵr sydd wedi cyfrannu’n helaeth at berthynas yr Eisteddfod â gwyddoniaeth dros y blynyddoedd.
Mae Guto Roberts o Lantrisant wedi gwasanaethu ar bwyllgor canolog Gwyddoniaeth a Thechnoleg yr Eisteddfod Genedlaethol ers ugain mlynedd, a bu ynghlwm â sefydlu’r babell wyddoniaeth gyntaf ar y maes yn 1971.
Dywedodd wrth golwg360 ei bod yn “allweddol” i wyddoniaeth gael lle blaenllaw yn yr Eisteddfod ymysg y celfyddydau a’r cystadlu.
Yr iaith a gwyddoniaeth
Dywedodd ei fod yn fraint i dderbyn yr anrhydedd, “ac yn fwy o fraint i weld gwyddoniaeth yn cael lle blaenllaw yma,” meddai.
“Os ydy’r iaith Gymraeg am barhau mae’n rhaid iddi fod yn fodern a chwmpasu pethau fel gwyddoniaeth a thechnoleg,” ychwanegodd.
Yn wreiddiol o Edern ym Mhen Llŷn, astudiodd Guto Roberts ffiseg yn y brifysgol yn Aberystwyth.
Bu hefyd wrth wraidd sefydlu’r Gymdeithas Wyddonol Gymraeg gyntaf erioed yn y Brifysgol honno, a bu’n bennaeth Ffiseg ym Mhrifysgol Morgannwg.
