Tony Blair eisiau rheolau mewnfudo llymach – ond dim Brexit

 


Mae’r cyn-Brif Weinidog Llafur, Tony Blair wedi galw am reolau mewnfudo newydd a allai olygu y byddai modd i Brydain aros yn yr Undeb Ewropeaidd er gwaethaf canlyniad y refferendwm.

Wrth gyfaddef nad yw’r drefn a gafodd ei chyflwyno gan ei lywodraeth ei hun yn addas bellach, mae e wedi ychwanegu ei enw at adroddiad yn galw am reolau llymach a thrafod rhyddid trigolion i symud rhwng gwledydd yr Undeb Ewropeaidd.

Dywedodd y byddai hynny’n bodloni dymuniad y bobol oedd wedi pleidleisio tros adael yr Undeb Ewropeaidd, ond yn galluogi Prydain i aros o fewn y drefn Ewropeaidd ar yr un pryd.

Mae e wedi galw ar y Blaid Lafur a Jeremy Corbyn i gefnogi ei alwad mewn ymgais i ddatrys yr anawsterau sy’n cael eu hachosi wrth geisio rhoi trefn ar faterion economaidd a mewnfudo ar yr un pryd.

Y farchnad sengl

Yn ôl Prif Weinidog Prydain, Theresa May, mewnfudo yw ei phrif flaenoriaeth yn y trafodaethau i adael yr Undeb Ewropeaidd, ond mae Brwsel yn mynnu bod rhaid gadael y farchnad sengl pe bai Brexit yn mynd rhagddo.

Mewn erthygl yn y Sunday Times, dywedodd Tony Blair: “Does dim gwyriad posib oddi ar Brexit heb fynd i’r afael â’r anfodlonrwydd a arweiniodd ato.

“Yn baradocsaidd, rhaid i ni barchu’r bleidlais refferendwm er mwyn ei newid.

“Gallwn gwtogi’r pethau y mae pobol yn teimlo sy’n niweidiol am fewnfudo Ewropeaidd, drwy newid polisïau domestig a thrwy gytuno ar newid o fewn Ewrop.

“Dyma’r union diriogaeth y dylai’r Blaid Lafur wersylla arni.”

Bai ar Blair?

Tony Blair, ar y cyfan, sy’n cael y bai gan bobol oedd wedi pleidleisio tros adael yr Undeb Ewropeaidd am y niferoedd uchel o fewnfudwyr yng ngwledydd Prydain, a hynny am nad oedd e wedi gweithredu ar reolau newydd i leihau’r niferoedd pan ymunodd gwledydd newydd yn 2004.

Bryd hynny, fe ddywedodd fod yr economi’n gryf a bod angen gweithwyr yng ngwledydd Prydain.

Ond fe ddywedodd yn ei erthygl heddiw “na ellir anwybyddu” ffactorau diwylliannol, cyflogau is a’r pwysau ar wasanaethau cyhoeddus.

Adroddiad

Yn ôl y Sunday Times, mae adroddiad gan Sefydliad Tony Blair, sydd wedi cael ei lunio gan gyn-arbenigwr polisïau Downing Street, Harvey Redgrave, yn galw ar Lywodraeth Prydain i:

  • orfodi mewnfudwyr i gofrestru wrth gyrraedd gwledydd Prydain fel bod modd asesu eu gallu i weithio neu astudio – mae’r drefn honno eisoes ar waith yng Ngwlad Belg
  • gorfodi trigolion o wledydd yr Undeb Ewropeaidd i ddangos tystiolaeth eu bod nhw wedi cael cynnig gwaith cyn dod i wledydd Prydain
  • gwahardd unrhyw un sydd heb ganiatâd i fod yng ngwledydd Prydain rhag rhentu tai, agor cyfrif banc a chael mynediad i fudd-daliadau
  • cyflwyno rheoliadau newydd yn atal mewnfudwyr o wledydd yr Undeb Ewropeaidd rhag cael gofal iechyd rhad ac am ddim os ydyn nhw’n economaidd anweithgar
  • galluogi prifysgolion i godi ffioedd uwch ar fyfyrwyr o wledydd yr Undeb Ewropeaidd na myfyrwyr o wledydd Prydain
  • trafod newid rheolau symud yn rhydd er mwyn atal pobol rhag dod i wledydd Prydain pe bai gwasanaethau cyhoeddus dan ormod o bwysau – roedd y cyn-Brif Weinidog David Cameron yn awyddus i sicrhau hyn cyn cynnal y refferendwm

Dywedodd Tony Blair y byddai parhau â Brexit “fel tîm yn chwe safle uchaf Uwch Gynghrair Lloegr yn penderfynu chwarae yn y Bencampwriaeth yn unig”.

Ychwanegodd mai Arlywydd yr Unol Daleithiau, Donald Trump yw’r unig arweinydd ymhlith prif gynghreiriaid Prydain sy’n credu bod Brexit yn “unrhyw beth ond niweidiol”.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd