Pecynnau plaen Llun: PA
Mae cyfreithiau newydd Ewrop ar labeli pecynnau tybaco wedi cael eu dilysu gan Lys Cyfiawnder Ewrop yn dilyn tair her gyfreithiol.
Mae penderfyniad y llys yn golygu bod modd i wledydd fwrw ati i gysoni pecynnau safonol.
Fel rhan o’u dyfarniad ddydd Mercher, dywedodd y Llys Cyfiawnder fod rheolau ar gysoni pecynnau, gwahardd sigaréts menthol a rheolau newydd ar e-sigarets yn gyfreithlon.
Roedd yr heriau cyfreithiol yn erbyn Cyfarwyddyd Cynnyrch Tybaco’r Undeb Ewropeaidd, a gafodd ei mabwysiadu yn 2014.
Cafodd yr heriau gan gwmni Philip Morris International a British American Tobacco eu gwrthod.
Roedd cwmnïau Japan Tobacco International ac Imperial Brands hefyd â buddiant yn yr achos.
Fel rhan o’r her, roedd angen i’r llys benderfynu a oedd yr Undeb Ewropeaidd wedi camddefnyddio’u hawl i ddeddfu ar dybaco, ac a ddylai’r mater gael ei benderfynu ar lefel Ewrop neu’n genedlaethol fesul gwlad.
Rhybuddion iechyd
Yn eu dyfarniad, dywedodd y llys fod rhybuddion iechyd yn golygu nad yw’r pecynnu cyfredol yn torri cyfreithiau Ewrop.
Ond fe fydd rhaid i becynnau gynnwys lluniau yn eu rhybuddion iechyd ar flaen ac ar gefn pecynnau, a rhybudd ychwanegol ar dop pecynnau.
Bydd y cyfarwyddyd cynnyrch newydd, felly, yn dod i rym ar Fai 20, ond fe fydd gan werthwyr flwyddyn i werthu eu stoc gyfredol.
Diben y rheolau yw lleihau nifer y bobol sy’n ysmygu yng ngwledydd yr Undeb Ewropeaidd o 2.4 miliwn.
Mae elusennau canser yn cefnogi’r mesurau newydd.