Tŵr Grenfell yn Kensington, Llundain wedi'r tân Llun: Dominic Lipinski/PA Wire
Fe fydd goroeswyr y tân yn Nhŵr Grenfell yn cynnal gwylnos heno, fis ar ôl y digwyddiad.
Fe fydd galarwyr yn ymgasglu ger cofeb ysgrifenedig sydd wedi ymddangos yn ardal y tân yng ngorllewin Llundain.
Mae disgwyl i gwestau rhagor o’r bobol fu farw gael eu hagor yn Llys Crwner Westminster heddiw.
Mae lle i gredu bod o leiaf 80 o bobol wedi marw yn y tân yn yr adeilad 24 llawr ar Fehefin 14.
Fe gollodd cannoedd o deuluoedd eu cartrefi, mae nifer o wleidyddion wedi ymddiswyddo ac mae tensiwn rhwng trigolion lleol a’r awdurdodau erbyn hyn.
Mae timau achub yn parhau i chwilio am gyrff, ac mae disgwyl i’r broses honno bara rhai misoedd eto.
Ymchwiliad cyhoeddus
Mae’r rhai sydd wedi’u heffeithio gan y tân wedi cael rhagor o amser i ystyried pa faterion hoffen nhw i ymchwiliad cyhoeddus eu hystyried.
Mae ymgyrchwyr eisoes wedi dweud eu bod nhw’n barod i droi eu cefn ar yr ymchwiliad oni bai ei fod yn cael ei ymestyn i ystyried problemau systemig yn ogystal â’r hyn oedd wedi achosi’r tân.
Y dyddiad cau ar gyfer cyflwyno’r materion yw Gorffennaf 28.
Mae ymdrechion ar y gweill drwy wledydd Prydain i sicrhau bod adeiladau oedd wedi defnyddio’r un cladin ag oedd ar yr adeilad yn ddiogel.
Mae 211 o adeiladau ar draws 55 o awdurdodau lleol wedi methu profion diogelwch erbyn hyn.