Cyfreithiwr Ian Brady: “Dim gwybodaeth” am leoliad corff bachgen

Diweddarwyd am  


Heddlu Canol Manceinion yn chwilio Saddleworth Moor yn 1986 am gorff Keith Bennett a gafodd ei lofruddio gan Ian Brady a Myra Hindley. (Llun: PA)
Mae cyfreithiwr Ian Brady wedi dweud y byddai “wedi synnu” petai llofrudd y Moors wedi cadw gwybodaeth rhag yr heddlu ynglŷn â lle cafodd corff y bachgen 12 oed, Keith Bennett, ei gladdu.

Mae Heddlu Canol Manceinion wedi dweud bod yr achos yn parhau ar agor.

Roedd Robin Makin wedi siarad gydag Ian Brady, 79, yn Ysbyty Seiciatryddol Ashworth ar Lannau Merswy llai na dwy awr cyn iddo farw nos Lun i drafod materion cyfreithiol a’r trefniadau ar gyfer ei angladd.

Dywedodd y cyfreithiwr nad oedd lleoliad corff Keith Bennett wedi cael ei drafod yn ystod y cyfarfod ac nad oedd erioed wedi ei holi ynglŷn â’r bachgen.

Roedd Keith Bennett yn un o bump o blant a gafodd eu harteithio a’u lladd gan Ian Brady a’i bartner Myra Hindley yn y 1960au. Corff Keith Bennett yw’r unig un sydd erioed wedi cael ei ddarganfod.

“Dim gwybodaeth”

Dywedodd Robin Makin wrth raglen Today ar Radio 4: “Fe fyddwn i’n synnu petai ganddo wybodaeth a fyddai’n ddefnyddiol. Roedd wedi mynd i’r Moors amser hir yn ôl ac rwy’n credu petai wybodaeth ganddo, y byddai wedi ei rhannu bryd hynny.”

Ychwanegodd: “Rwy’n gobeithio’n fawr fod modd dod o hyd i’r gweddillion ond yn anffodus does gen i ddim gwybodaeth a allai helpu.”

Dywedodd Martin Bottomley, o Heddlu Canol Manceinion y byddai swyddogion yn gweithredu ar wybodaeth “credadwy” a allai eu helpu i ddod o hyd i gorff Keith Bennett.

“Ni fydd Heddlu Canol Manceinion fyth yn cau’r achos yma. Nid yw marwolaeth Brady yn newid hynny.”

Yn 1966 cafodd Ian Brady a Myra Hindley eu carcharu am oes am ladd John Kilbride, 12, Lesley Ann Downey, 10, ac Edward Evans, 17, yn 1966.

Yn ddiweddarach fe gyfaddefodd y ddau eu bod hefyd wedi llofruddio Pauline Reade, 16, a Keith Bennett, 12 oed.

Bu farw Myra Hindley yn y carchar yn 60 oed yn 2002.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd