Bydd Cyngor Sir Caerfyrddin yn cyfarfod heddiw i drafod y posibilrwydd o gau Llysoedd Barn Caerfyrddin.
Daw hyn yn dilyn cyhoeddiad diweddar i gau deg o lysoedd barn yng Nghymru.
Mae dyfodol 91 o lysoedd a thribiwnlysoedd ar draws Cymru a Lloegr yn y fantol yn sgil cynlluniau newydd Llywodraeth Prydain.
‘Mynegi pryderon’
Mae Cymdeithas y Gyfraith wedi mynegi eu pryderon ynglŷn â chau’r llysoedd hyn, ac yn honni y byddai’n rhaid i bobol deithio ymhell, a hynny ar drafnidiaeth gyhoeddus, i gyrraedd eu llys agosaf.
Ond, mae Gweinidog y Llysoedd, Shailesh Vara, yn mynnu y byddai modd i bobol gyrraedd llys o fewn awr yn y car ar ôl cau’r canolfannau hyn.
Mae Cymdeithas y Gyfraith wedi cyhoeddi map ar-lein i ddangos sut y byddai cau’r llysoedd yn effeithio ar y bobol sy’n defnyddio’r canolfannau hynny.
Mae gan y llysoedd a’r cynghorau sir gyfle i drafod dyfodol y canolfannau, ond daw’r cyfnod ymgynghori i ben ar Hydref 8.
‘Dan fygythiad’
Y llysoedd sydd o dan fygythiad yng Nghymru yw:
Llysoedd Barn Aberhonddu
Llysoedd Barn Pen-y-bont ar Ogwr
Canolfan Gwrandawiadau Sifil, Teuluol ac Ewyllysiau Caerfyrddin
Llysoedd Barn Caerfyrddin
Llys y Goron a Llys Ynadon Dolgellau
Llys Ynadon Caergybi
Llys Sifil a Theuluol Llangefni
Llys Sifil a Theuluol Nedd Port Talbot
Llys Ynadon Pontypridd
Llys Ynadon Prestatyn
Tribiwnlys a Chanolfan Gwrandawiadau Wrecsam