Stephen Doughty (chwith) yn canfasio gyda Carwyn Jones (o'i wefan)
Fe lwyddodd Llafur i ddal ei gafael yn gyfforddus ar sedd seneddol De Caerdydd a Phenarth.
Ond dim ond chwarter y pleidleiswyr a drafferthodd fynd i’r bythau wrth i Stephen Doughty gynyddu ei gyfran o’r bleidlais a maint ei fwyafrif.
Yr union ffigwr pleidleisio oedd 25.65%, ymhell dan hanner y ganran yn yr Etholiad Cyffredinol, pan enillodd Alun Michael, sydd bellach yn gobeithio bod yn Gomisiynydd Heddlu De Cymru.
Roedd yna symudiad o fwy nag 8% yn y pleidleisiau oddi wrth y Ceidwadwyr at Lafur, a gafodd bron hanner y cyfanswm a mwyafrif o 5,334.
Roedd yna gynnydd hefyd yng nghanran Plaid Cymru, UKIP a’r Gwyrddion.
Yn ei araith wedi’r canlyniad, fe ddywedodd Stephen Doughty fod y canlyniad yn dangos “gwrthwynebiad clir” i bolisïau Llywodraeth y Glymblaid yn San Steffan.
Y canlyniad
Stephen Doughty (Llafur) 9,193
Craig Williams (Ceidwadwyr) 3,859
Bablin Molik (Democratiaid Rhyddfrydol) 2,103
Luke Nicholas (Plaid Cymru) 1,854
Simon Zeigler (UKIP) 1,179
Anthony Slaughter (Gwyrdd) 800
Andrew Jordan (Llafur Sosialaidd) 235
Robert Griffiths (Comiwnyddion) 213