Ynys Môn yw’r rhan hapusaf o Gymru, a’r pumed lle hapusaf yn y Deyrnas Unedig gyfan, yn ôl arolwg newydd gan y Swyddfa Ystadegau Gwladol.
Roedd Ynys Môn hefyd yn yr ail safle ar draws y Deyrnas Unedig o ran cyfartaledd y bobol oedd yn credu fod eu bywydau yn werth chweil.
Mae’r indecs hapusrwydd a gomisiynwyd gan David Cameron yn awgrymu bod ynysoedd yn llefydd hapus iawn ar y cyfan.
Y llefydd hapusaf yn y Deyrnas Unedig yn ei gyfanrwydd yw Ynysoedd Erch a Shetland yn yr Alban.
Yng Nghymru, mae Sir y Fflint yn yr ail safleo ran hapusrwydd, a Chardis Ceredigion yn drydydd.
Siroedd y Cymoedd, sef Torfaen, Merthyr Tudful, Blaenau Gwent, a’r Rhondda sydd ar waelod y tabl yng Nghymru.
Torfaen yw’r chweched lle mwyaf diflas yn y Deyrnas Unedig, a Merthyr Tudful yw’r nawfed mwyaf diflas.
Yn ôl y tabl 7.4 allan o 10 yw cyfartaledd hapusrwydd poblogaeth Cymru, yr un cyfartaledd a Lloegr, ac 0.01 yn llai na chyfartaledd y Deyrnas Unedig yn ehangach.
Ond mae’r Alban a Gogledd Iwerddon yn hapusach – y Sgotiaid ar 7.48 a Gogledd Iwerddon ar 7.54.
Ond mae pobol Ynys Môn yn rhoi 7.76 allan o 10 i’w hunain ar gyfartaledd, gan olygu mai nhw yw’r bobol hapusaf yng Nghymru, a’r pumed hapusaf yn y Deyrnas Unedig.
Ar draws Prydain, Swydd Aberdeen yn yr Alban sydd yn yr ail safle, Rutland yn nwyrain canolbarth Lloegr yn y trydydd safle, a Highland yn yr Alban yn bedwerydd.
| Cymru | 7.40 |
| Ynys Môn | 7.76 |
| Sir y Fflint | 7.67 |
| Ceredigion | 7.64 |
| Powys | 7.61 |
| Sir Fynwy | 7.56 |
| Sir Benfro | 7.55 |
| Gwynedd | 7.50 |
| Bro Morgannwg | 7.48 |
| Wrecsam | 7.47 |
| Sir Ddinbych | 7.45 |
| Pen y Bont ar Ogwr | 7.39 |
| Caerdydd | 7.38 |
| Conwy | 7.34 |
| Sir Gaerfyrddin | 7.33 |
| Castell-nedd Port Talbot | 7.31 |
| Caerffili | 7.31 |
| Casnewydd | 7.30 |
| Abertawe | 7.26 |
| Rhondda, Cynon, Taff | 7.26 |
| Blaenau Gwent | 7.24 |
| Merthyr Tydful | 7.17 |
| Torfaen | 7.12 |
