RSS

Golwg360

MwyCau 

Llawysgrif Cyfraith Hywel Dda yn cael ei gwerthu am £541,250

Gorffennaf 10, 2012 14:20 Diweddarwyd am 16:44


Mae  un o lawysgrifau mwyaf hanesyddol Cymru wedi cael ei werthu heddiw am £541,250 i Lyfrgell Genedlaethol Cymru.

Mae llawysgrif Cyfraith Hywel Dda yn dyddio nôl i 14eg ganrif ac yn un o’r llawysgrifau cyntaf i gael ei hysgrifennu yn yr iaith Gymraeg.

Mae’r llyfr, gafodd ei werthu mewn ocsiwn yn Sotheby’s bore ma, yn manylu ar gyfraith arloesol a luniwyd gan Hywel Dda, gan gynnwys hawliau i ferched.

Yn y 1700au, fe aeth gwladychwyr â’r llyfr gyda nhw i America ac yna ei basio ‘mlaen drwy genedlaethau yn y cymunedau Cymraeg ym Mhennsylvania.

Cafodd y llyfr ei werthu gan Gymdeithas Hanesyddol Massachusetts oedd yn debygol o fod wedi derbyn y llawysgrif fel anrheg oddi wrth ymfudwyr Cymreig yn gynnar yn y 19eg ganrif.

Fe lwyddodd y Llyfrgell Genedlaethol i brynu’r llawysgrif gyda chymorth ariannol oddi wrth Cronfa Dreftadaeth y Loteri.

Dywedodd y Dr Manon Williams, Cadeirydd Pwyllgor Cymru Cronfa Dreftadaeth y Loteri: “Roedd yr ocsiwn yma’n gyfle unigryw i ddod ag un o wir drysorau Cymru adref ac rydw i’n falch iawn ein bod wedi gallu gweithredu’n gyflym a chynnig yr ariannu angenrheidiol i wireddu’r broses.
“Llyfrgell Genedlaethol Cymru yw cartref naturiol y llawysgrif brin hon a gall arbenigwyr nawr ei hastudio a’i dehongli gan sicrhau ei bod yn cael ei deall yn well am y tro cyntaf.

“Yn ogystal â darparu cyfleon hyfforddi newydd ar gyfer y staff presennol, mae yna gynlluniau i brentisiaid gael rhan mewn datblygu ymchwil newydd ac ennill sgiliau arbenigol tra’n sicrhau’r darn pwysig hwn o hanes Cymru ar gyfer y dyfodol. Hefyd fe fydd yna gyfleon cyffrous i wirfoddolwyr gymryd rhan yn ystod y prosiect cyfan.”

Mae copïau eraill o’r cyfreithiau, rhai sydd hefyd yn dyddio nôl i’r 14eg ganrif, yn cael eu cadw yn y Llyfrgell Genedlaethol Cymru yn Aberystwyth.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.