Mae Heddlu’r Gogledd wedi cyhoeddi enwau’r ddau ddyn ifanc fu farw mewn damwain car ar yr A542 rhwng Llangollen a Bwlch yr Oernant ddoe.
Roedd Jonathon Lee Cassidy Jones a Dale Thomas Williams yn 18 oed ac yn dod o ardal Riwabon ger Wrecsam.
Cafodd yr heddlu eu galw i’r digwyddiad ym Mwlch yr Oernant am 12.36pm brynhawn dydd Llun, 9 Ionawr.
Roedd tri pherson yn teithio yn y car Peugeot lliw arian a glas ar y pryd. Credir bod y car wedi gwyro oddiar y ffordd ac wedi taro yn erbyn coeden.
Bu farw Jonathon Lee Cassidy Jones a Dale Thomas Williams yn y fan a’r lle a chafodd trydydd person anafiadau i’w frest. Mae’n parhau i gael triniaeth yn Ysbyty Wrecsam Maelor ond mae’n debyg nad yw ei anafiadau yn bygwth bywyd.
Roedd y car yn teithio o Fwlch yr Oernant tuag at Langollen pan ddigwyddodd y gwrthdrawiad.
Mae’r heddlu’n parhau i ymchwilio i’r ddamwain ac yn apelio am dystion.
Fe ddylai unrhyw un â gwybodaeth gysylltu gyda’r Heddlu ar 101 neu 0300 3300 101.
